റിപ്പോർട്ട്: അൻവർ ഷരിഫ്
കോഴിക്കോട്: കോടഞ്ചേരി നിരന്നപാറയിൽ ശക്തമായ മണ്ണിടിച്ചിൽ. നിരന്നപാറ റോഡിൽ മുൻപ് പ്രവർത്തിച്ചിരുന്ന കനിങ്കൽ ക്വാറിക്ക് സമീപമാണ് ഉരുൾപൊട്ടലിന് സമാനമായ രീതിയിൽ വലിയ തോതിൽ മണ്ണ് ഇടിഞ്ഞുവീണത് (Nirannapara landslide). മണ്ണിടിച്ചിലിനെ തുടർന്ന് സമീപ പ്രദേശത്തെ ഗണപതി പ്ലാക്കൽ ടോം ജോർജിന്റെ ഉൾപ്പെടെയുള്ള കർഷകരുടെ ഏക്കറുകണക്കിന് കൃഷിയിടങ്ങൾ ഒലിച്ചുപോയതായി പ്രദേശവാസികൾ അറിയിച്ചു. സമീപത്ത് വീടുകൾ ഇല്ലാതിരുന്നതിനാൽ വലിയ ദുരന്തം ഒഴിവായി.
മണ്ണും ചെളിയും റോഡിലേക്ക് ഒഴുകിയെത്തിയതോടെ കോടഞ്ചേരി-നിരന്നപാറ റോഡിലൂടെയുള്ള ഗതാഗതം തടസ്സപ്പെട്ടു. പ്രദേശത്ത് ഇപ്പോഴും ശക്തമായ മഴ തുടരുന്നതിനാൽ കൂടുതൽ മണ്ണിടിച്ചിലിന് സാധ്യതയുണ്ടെന്ന ആശങ്കയും നിലനിൽക്കുന്നുണ്ട്. അധികൃതർ സ്ഥലത്തെത്തി സ്ഥിതിഗതികൾ വിലയിരുത്തുന്നുണ്ട്. മഴ ശക്തമായി തുടരുന്ന സാഹചര്യത്തിൽ മലയോര മേഖലകളിൽ ജാഗ്രത പാലിക്കണമെന്ന് നിർദേശം നൽകിയിട്ടുണ്ട്.
Summary: A major landslide occurred near the former Kaninkal quarry area on the Kodanchery-Nirannapara road in Kozhikode. Acres of farmland were washed away, while traffic was disrupted due to mud and debris blocking the road. No houses were located nearby, preventing a major tragedy.
