തൃശൂർ: മുണ്ടത്തിക്കോട് വെടിക്കെട്ട് പുരയിലുണ്ടായ സ്ഫോടനത്തിൽ മരിച്ചവരിൽ ഏഴുപേരെ തിരിച്ചറിഞ്ഞു. ഇതിൽ നാലുപേരുടെ പോസ്റ്റ്മോർട്ടം നടപടികൾ പൂർത്തിയാക്കി മൃതദേഹങ്ങൾ ബന്ധുക്കൾക്ക് വിട്ടുനൽകി. ദുരന്തബാധിതർക്കുള്ള സാമ്പത്തിക സഹായം പ്രഖ്യാപിക്കുന്നതിനായി സർക്കാർ തെരഞ്ഞെടുപ്പ് കമ്മീഷന്റെ അനുമതി തേടുമെന്ന് മന്ത്രി വി.എൻ. വാസവൻ അറിയിച്ചു.(Mundathikode blast, 7 of the dead identified; Bodies of 4 handed over)
ദുരന്തത്തിന്റെ പശ്ചാത്തലത്തിൽ സ്ഥിതിഗതികൾ വിലയിരുത്താൻ ബുധനാഴ്ച രാവിലെ 10 മണിക്ക് പ്രത്യേക കാബിനറ്റ് യോഗം ചേരും. മൃതദേഹങ്ങൾ പൂർണ്ണമായും തിരിച്ചറിയുന്നതിനായി ഡിഎൻഎ പരിശോധന പുരോഗമിക്കുകയാണ്. കാണാതായവർക്കായി കെഡാവർ നായകളെ ഉപയോഗിച്ചുള്ള തിരച്ചിൽ തുടരുന്നു. പരിക്കേറ്റവർക്ക് മികച്ച ചികിത്സ ഉറപ്പാക്കാൻ വിവിധ മെഡിക്കൽ കോളേജുകളിൽ നിന്നുള്ള വിദഗ്ധ ഡോക്ടർമാരുടെ സംഘം തൃശൂരിൽ ക്യാമ്പ് ചെയ്യുന്നുണ്ട്.
സംസ്ഥാനത്ത് ലോക്സഭാ തെരഞ്ഞെടുപ്പ് പെരുമാറ്റച്ചട്ടം നിലനിൽക്കുന്നതിനാലാണ് ധനസഹായം പ്രഖ്യാപിക്കാൻ കമ്മീഷന്റെ പ്രത്യേക അനുമതി തേടുന്നത്. അപകടത്തിൽ മരിച്ച 13 പേരിൽ ഏഴുപേരെയാണ് നിലവിൽ തിരിച്ചറിഞ്ഞിട്ടുള്ളത്. ബാക്കിയുള്ളവരുടെ ശരീരഭാഗങ്ങൾ ശാസ്ത്രീയ പരിശോധനയ്ക്ക് വിധേയമാക്കി വരികയാണ്. തിരിച്ചറിഞ്ഞ നാല് പേരുടെ മൃതദേഹങ്ങൾ സംസ്കാര ചടങ്ങുകൾക്കായി ബന്ധുക്കൾക്ക് കൈമാറി. മുണ്ടത്തിക്കോട്ട് സ്ഫോടനമുണ്ടായ സ്ഥലത്ത് ഇപ്പോഴും കനത്ത സുരക്ഷാ പരിശോധനകൾ തുടരുകയാണ്.
അപകടം നടന്ന സമയത്ത് എത്രപേർ സ്ഥലത്തുണ്ടായിരുന്നു എന്നതിൽ ഇപ്പോഴും വ്യക്തമായ കണക്കുകൾ ലഭ്യമായിട്ടില്ല. സ്ഫോടനം നടന്ന സ്ഥലത്ത് ജോലി ചെയ്തിരുന്നവർക്കായി 40 ഊണുകൾ ഓർഡർ ചെയ്തിരുന്നതായി റവന്യൂ മന്ത്രി കെ. രാജൻ അറിയിച്ചു. ഇതുപ്രകാരം നാൽപ്പതോളം തൊഴിലാളികൾ സ്ഥലത്തുണ്ടായിരുന്നുവെന്നാണ് നിഗമനം.
5 മൃതദേഹങ്ങളുടെയും 11 ശരീരഭാഗങ്ങളുടെയും പോസ്റ്റ്മോർട്ടം പൂർത്തിയായി. ബാക്കിയുള്ള 15 ഭാഗങ്ങൾ കൂടി പോസ്റ്റ്മോർട്ടം ചെയ്യാനുണ്ട്. തിരിച്ചറിയാനാവാത്ത ശരീരഭാഗങ്ങൾ തിരിച്ചറിയാൻ രാജീവ് ഗാന്ധി ബയോ ടെക്നോളജിയിൽ നിന്നുള്ള വിദഗ്ധ സംഘം തൃശൂരിലെത്തി നടപടികൾ ആരംഭിച്ചു. പരിക്കേറ്റ 13 പേരിൽ 10 പേർ ഐസിയുവിലാണ്. ലൈസൻസി സതീശൻ, പ്രവീൺ എന്നിവരുടെ നില അതീവ ഗുരുതരമായി തുടരുന്നു.
ദുരന്തത്തിന്റെ പശ്ചാത്തലത്തിൽ നാല് സ്ഥലങ്ങളിലായി കൺട്രോൾ റൂമുകൾ തുറന്നിട്ടുണ്ട്. കോട്ടയം, കോഴിക്കോട്, പാലക്കാട്, എറണാകുളം ജില്ലകളിൽ നിന്നുള്ള പ്രത്യേക മെഡിക്കൽ സംഘം തൃശൂർ മെഡിക്കൽ കോളേജിൽ ക്യാമ്പ് ചെയ്യുന്നു. അപകടത്തിൽപ്പെട്ടവർക്കുള്ള ധനസഹായം സംബന്ധിച്ച തീരുമാനം ഇന്ന് ചേരുന്ന പ്രത്യേക കാബിനറ്റ് യോഗത്തിലുണ്ടാകും.നെഞ്ചുപൊട്ടുന്ന വേദനയോടെയാണ് നാട്ടുകാർ രക്ഷാപ്രവർത്തനത്തിൽ പങ്കുചേരുന്നത്.
