കീം പ്രവേശന പരീക്ഷ ചരിത്രവിജയമെന്ന് മന്ത്രി ആർ. ബിന്ദു
Jun 11, 2024, 07:40 IST
തിരുവനന്തപുരം: സംസ്ഥാനത്ത് ആദ്യമായി നടത്തിയ ‘കീം’ ഓൺലൈൻ പരീക്ഷ എഴുതിയത് 79,044 വിദ്യാര്‍ഥികൾ. ജൂൺ അഞ്ചിന് ആരംഭിച്ച പരീക്ഷ ഇന്നലെ പൂർത്തിയായി. സംസ്ഥാനത്ത് ആദ്യമായാണ് ഇത്ര വിപുലമായ രീതിയിൽ ഓൺലൈൻ പരീക്ഷ നടത്തിയത്. പ്രവേശന പരീക്ഷ ചരിത്രവിജയം കുറിച്ചതായി ഉന്നതവിദ്യാഭ്യാസ മന്ത്രി ആർ. ബിന്ദു പറഞ്ഞു. ഈ മാസം അഞ്ചു മുതൽ ഒൻപതു വരെ എൻജിനിയറിംഗ് പരീക്ഷയും 10ന് ഫാർമസി പരീക്ഷയുമായിരുന്നു. ഒരു ദിവസം 18,993 പേർക്ക് പരീക്ഷ എഴുതാന്‍ സൗകര്യം ഒരുക്കിയിരുന്നു. പരീക്ഷാഫലം എത്രയും വേഗം പ്രസിദ്ധീകരിച്ചു പ്രവേശന നടപടികളിലേക്കു കടക്കാൻ എൻട്രൻസ് കമ്മീഷണർക്കു മന്ത്രി നിർദേശം നൽകിയിട്ടുണ്ട്.