മഞ്ചേശ്വരം: കുണ്ടുകുളുക്കെ ബീച്ചിൽ കുടുംബത്തോടൊപ്പം അവധി ആഘോഷിക്കാനെത്തിയ യുവാവിനെ കടലിൽ കാണാതായി. മഞ്ചേശ്വരം ചൗക്കി സ്വദേശിയായ ഉമറുൽ ഫാറൂഖിന്റെയും റസീനയുടേയും മകൻ മുഹമ്മദ് സൈനുൽ ആബിദിനെ (18) ആണ് ബുധനാഴ്ച വൈകുന്നേരത്തോടെ തിരമാലയിൽപ്പെട്ട് കാണാതായത് (Manjeshwar Beach Accident).
കടൽത്തീരത്ത് കളിച്ചു കൊണ്ടിരുന്ന സൈനുൽ ആബിദ് അപ്രതീക്ഷിതമായി വന്ന ശക്തമായ തിരമാലയിൽപ്പെടുകയായിരുന്നു. അപകടം നടന്ന ഉടൻ തന്നെ നാട്ടുകാരും മഞ്ചേശ്വരം പോലീസും തീരദേശ സുരക്ഷാ സേനയും ചേർന്ന് കടലിൽ വ്യാപകമായ തിരച്ചിൽ ആരംഭിച്ചു. എന്നാൽ പ്രതികൂല കാലാവസ്ഥയും ശക്തമായ ഒഴുക്കും കാരണം യുവാവിനെ ഇതുവരെ കണ്ടെത്താനായിട്ടില്ല.
കുട്ടികളുൾപ്പെടെ നിരവധി പേർ എത്തുന്ന കുണ്ടുകുളുക്കെ ബീച്ചിൽ മതിയായ സുരക്ഷാ ക്രമീകരണങ്ങളില്ലെന്ന പരാതി നാട്ടുകാർക്കിടയിൽ ശക്തമാണ്. മുൻപും ഈ ഭാഗത്ത് സമാനമായ അപകടങ്ങൾ സംഭവിച്ചിട്ടുണ്ടെന്നും ലൈഫ് ഗാർഡുമാരുടെ സേവനവും അപകട മുന്നറിയിപ്പ് ബോർഡുകളും സ്ഥാപിക്കണമെന്നും പ്രദേശവാസികൾ ആവശ്യപ്പെട്ടു. യുവാവിനായുള്ള തിരച്ചിൽ ഇന്നും തുടരുകയാണ്.
Summary: An 18-year-old youth, Muhammed Zainul Abid, went missing after being swept away by a strong wave at Kundukulukke Beach in Manjeshwar. The incident occurred on Wednesday evening while he was visiting the beach with his family. Despite extensive search operations by the local police, residents, and the Coastal Security Police, he has not been found yet. Locals have raised concerns over the lack of safety measures and lifeguards at the popular beach spot.
