തിരുവനന്തപുരം: നഗരത്തിലെ പ്രധാന സാംസ്കാരിക കേന്ദ്രമായ മാനവീയം വീഥിയിൽ യുവാവിനെ മാരകായുധം കൊണ്ട് ആക്രമിച്ച കേസിലെ പ്രതികളെ മ്യൂസിയം പോലീസ് അറസ്റ്റ് ചെയ്തു (Manaveeyam Veedhi Attack Case). ബാലരാമപുരം സ്വദേശികളായ കാശിനാഥൻ (22), ഉണ്ണിക്കൃഷ്ണൻ (23) എന്നിവരാണ് പിടിയിലായത്. ഞായറാഴ്ച രാത്രി ഒമ്പത് മണിയോടെയായിരുന്നു ആക്രമണം. ജോലി കഴിഞ്ഞ് സുഹൃത്തുക്കളോടൊപ്പം ചായ കുടിച്ചുനിൽക്കുകയായിരുന്ന മലയിൻകീഴ് സ്വദേശിയായ യുവാവിനെ പ്രതികൾ അസഭ്യം പറയുകയും, ഇത് ചോദ്യം ചെയ്തതോടെ മാരകായുധം ഉപയോഗിച്ച് ആക്രമിക്കുകയുമായിരുന്നു.
അക്രമത്തിൽ യുവാവിന്റെ മുഖത്തിന് ഗുരുതരമായി പരിക്കേറ്റു. തടയാൻ ശ്രമിച്ച സുഹൃത്തുക്കളെയും പ്രതികൾ മർദ്ദിച്ചു. പരിക്കേറ്റ യുവാവ് നിലവിൽ ചികിത്സയിലാണ്. അറസ്റ്റിലായ കാശിനാഥനെതിരെ ബാലരാമപുരം സ്റ്റേഷനിൽ മൂന്നോളം വധശ്രമക്കേസുകൾ നിലവിലുണ്ടെന്ന് പോലീസ് അറിയിച്ചു.
കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. മാനവീയം വീഥിയിൽ സാമൂഹിക വിരുദ്ധ ശല്യം വർധിക്കുന്നതായി പരാതികൾ ഉയരുന്നതിനിടെയാണ് ഈ ക്രൂരമായ ആക്രമണം നടന്നത്.
News Summary: The Museum Police in Thiruvananthapuram have arrested two youths, Kashinathan (22) and Unnikrishnan (23), for attacking a youth with lethal weapons at Manaveeyam Veedhi. The incident occurred on Sunday night when the victim, a native of Malayinkeezhu, questioned the accused for verbally abusing him. The victim sustained serious facial injuries and is hospitalized. One of the accused, Kashinathan, is reportedly involved in multiple attempted murder cases. Both suspects have been remanded by the court.
