വിസ വാഗ്ദാനം ചെയ്ത് ലക്ഷങ്ങൾ തട്ടിയയാൾ പിടിയിൽ
May 4, 2024, 20:50 IST
കൊല്ലം: വിദേശത്തേക്ക് വിസ തരപ്പെടുത്തി നൽകാമെന്ന് വാഗ്ദാനം ചെയ്ത് കൊല്ലം സ്വദേശിനികളായ യുവതികളിൽ നിന്ന് ലക്ഷങ്ങൾ തട്ടിയയാളെ പിടികൂടി. കർണാടക സ്വദേശിയായ ഷാജഹാനെയാണ് (38) കൊല്ലം വെസ്റ്റ് പൊലീസ് അറസ്റ്റ് ചെയ്തത്. യുവതികൾക്ക് ഇംഗ്ലണ്ടിൽ ഡേ കെയർ സ്ഥാപനത്തിൽ ജോലിക്ക് വിസ തരപ്പെടുത്തി നൽകാമെന്ന് വിശ്വസിപ്പിച്ച് 2022 നവംബർ മുതൽ 2023 ജനുവരി വരെയുള്ള കാലയളവിൽ പല തവണകളായി 2,15,000 രൂപയാണ് പ്രതി കൈക്കലാക്കിയത്. പണം നൽകിയ ശേഷവും വിസ ലഭിക്കാതായതോടെ പാസ്പോർട്ടും നൽകിയ പണവും തിരികെ ആവശ്യപ്പെട്ടു. ഇത് നൽകാൻ പ്രതി തയാറായില്ല. തുടർന്ന് കൊല്ലം വെസ്റ്റ് പൊലീസ് സ്റ്റേഷനിൽ പരാതി നൽകുകയായിരുന്നു.