തിരുവനന്തപുരം: കോഴിക്കോട്, വയനാട്, കണ്ണൂർ, കാസറഗോഡ് ജില്ലകളിൽ അടുത്ത ഏഴ് ദിവസത്തേക്ക് ഭാഗികമായി വൈദ്യുതി നിയന്ത്രണം ഏർപ്പെടുത്തുമെന്ന് കെഎസ്ഇബി അറിയിച്ചു (Kerala Electricity News). പവർഗ്രിഡ് കോർപ്പറേഷന്റെ കോഴിക്കോട്ടെ പ്രധാന സബ്സ്റ്റേഷനിലുണ്ടായ സാങ്കേതിക തകരാറിനെത്തുടർന്നാണ് ഈ നടപടി.
കോഴിക്കോട് 400 കെവി സബ്സ്റ്റേഷനിലെ 500 എംവിഎ ട്രാൻസ്ഫോർമറിന്റെ ബുഷിംഗിലുണ്ടായ തകരാറാണ് വൈദ്യുതി പ്രതിസന്ധിക്ക് കാരണമായത്. ഇത് പരിഹരിക്കാൻ അടിയന്തര ഷട്ട്ഡൗൺ ആവശ്യമാണ്.അറ്റകുറ്റപ്പണികൾ പൂർത്തിയാക്കാൻ ഏകദേശം ഏഴ് ദിവസമെടുക്കും. ഈ കാലയളവിൽ നാല് ജില്ലകളിലും ലോഡ് ക്രമീകരണത്തിന്റെ ഭാഗമായി നിയന്ത്രണമുണ്ടാകും.
വൈദ്യുതി വിതരണ ശൃംഖലയിലെ ആഘാതം കുറയ്ക്കാൻ അനാവശ്യമായ വൈദ്യുത ഉപകരണങ്ങളുടെ ഉപയോഗം ഒഴിവാക്കി ഉപഭോക്താക്കൾ സഹകരിക്കണമെന്ന് കെഎസ്ഇബി അഭ്യർത്ഥിച്ചു.
ഓരോ പ്രദേശത്തെയും വൈദ്യുതി നിയന്ത്രണത്തിന്റെ കൃത്യമായ സമയക്രമം പ്രാദേശിക കെഎസ്ഇബി ഓഫീസുകൾ വഴി ലഭ്യമാകും.
പവർഗ്രിഡ് കോർപ്പറേഷൻ അറ്റകുറ്റപ്പണികൾ യുദ്ധകാലാടിസ്ഥാനത്തിൽ പൂർത്തിയാക്കി വിതരണം സാധാരണ നിലയിലാക്കാനുള്ള ശ്രമങ്ങൾ ആരംഭിച്ചിട്ടുണ്ട്.
News Summary: Partial electricity restrictions will be implemented in Kozhikode, Wayanad, Kannur, and Kasaragod districts for the next seven days due to a technical snag at PowerGrid Corporation’s 400 kV substation in Kozhikode. A fault in the 220 kV bushing of a 500 MVA transformer necessitates an emergency shutdown for repairs. KSEB has requested consumers to minimize electricity usage to help manage the load. Detailed schedules for local power cuts will be available through respective KSEB offices.
