റിപ്പോർട്ട്: അൻവർ ഷരിഫ്
കൊണ്ടോട്ടി: സ്തുത്യർഹമായ കരുതലിന്റെ കരുത്തിൽ റോഡിൽ നിന്ന് പിഞ്ചുകുഞ്ഞിന്റെ ജീവൻ രക്ഷിച്ച ബസ് ജീവനക്കാരെ കൊണ്ടോട്ടി സബ് റീജണൽ ട്രാൻസ്പോർട്ട് ഓഫീസ് ആദരിച്ചു (Kondotty Bus Staff Honored). സഫ- മർവ ബസ് സർവീസിലെ കണ്ടക്ടർ മുഹമ്മദ് നവാസ്, ഡ്രൈവർ രാമചന്ദ്രൻ എന്നിവരെയാണ് സമയോചിതമായ ഇടപെടലിലൂടെ ഒരു പിഞ്ചുജീവൻ സംരക്ഷിച്ചതിന് അധികൃതർ അനുമോദിച്ചത്. ഇതിനോടൊപ്പം തന്നെ റോഡ് സുരക്ഷാ ബോധവൽക്കരണ പരിപാടിയും സംഘടിപ്പിച്ചു.
കൊണ്ടോട്ടി ശിഹാബ് തങ്ങൾ മെമ്മോറിയൽ ഡയാലിസിസ് സെന്റർ ഓഡിറ്റോറിയത്തിൽ നടന്ന ചടങ്ങ് മലപ്പുറം ജില്ലാ പഞ്ചായത്ത് പ്രസിഡന്റ് പി.എ. ജബ്ബാർ ഹാജി ഉദ്ഘാടനം ചെയ്യുകയും ആദരിക്കൽ കർമ്മം നിർവ്വഹിക്കുകയും ചെയ്തു. കൊണ്ടോട്ടി ജോയിന്റ് റീജണൽ ട്രാൻസ്പോർട്ട് ഓഫീസർ എ.പി. മിനി അധ്യക്ഷത വഹിച്ച ചടങ്ങിൽ മോട്ടോർ വെഹിക്കിൾസ് ഇൻസ്പെക്ടർ പി.കെ. മുഹമ്മദ് ഷഫീക്ക് ഡ്രൈവർമാർക്കായി റോഡ് സുരക്ഷാ ക്ലാസ് നയിച്ചു. അസിസ്റ്റന്റ് മോട്ടോർ വെഹിക്കിൾസ് ഇൻസ്പെക്ടർ കെ.സി. സൗരഭ് സംസാരിച്ചു.
വിവിധ സംഘടനകളും ജീവനക്കാരെ ആദരിച്ചു. കൊണ്ടോട്ടി ഏരിയ ബസ് ഓപ്പറേറ്റേഴ്സ് ഓർഗനൈസേഷൻ, കൊണ്ടോട്ടി താലൂക്ക് ഡ്രൈവിംഗ് സ്കൂൾ കൂട്ടായ്മ, സംയുക്ത ബസ് തൊഴിലാളി യൂണിയൻ എന്നിവരും ഉപഹാരങ്ങൾ കൈമാറി. നൂറുകണക്കിന് ആളുകൾ പങ്കെടുത്ത ചടങ്ങിൽ, റോഡിലെ ജാഗ്രതയും മനുഷ്യത്വപരമായ ഇടപെടലും എല്ലാ ഡ്രൈവർമാർക്കും മാതൃകയാണെന്ന് അധികൃതർ വ്യക്തമാക്കി.
Summary: Transport authorities in Kondotty honored bus conductor Mohammed Navas and driver Ramachandran for their timely intervention in saving a toddler’s life on the road. A felicitation ceremony and road safety awareness program were held to recognize their heroic action, with participation from local officials, transport organizations, and the public.
