തിരുവനന്തപുരം: സാമ്പത്തിക പ്രതിസന്ധികൾക്കിടയിലും കേരളത്തിന്റെ അടിസ്ഥാന സൗകര്യ വികസനത്തിനും പ്രാദേശിക വളർച്ചയ്ക്കുമായി വലിയ പദ്ധതികളാണ് മുഖ്യമന്ത്രി വി.ഡി. സതീശൻ ബജറ്റിലൂടെ പ്രഖ്യാപിച്ചിരിക്കുന്നത്. ഓരോ ജില്ലയുടെയും പ്രത്യേകതകൾ കണക്കിലെടുത്ത് തയ്യാറാക്കിയ പ്രധാന പദ്ധതികൾ താഴെ പറയുന്നവയാണ്.(Kerala Budget 2026 District Wise Development Projects and Highlights)
തിരുവനന്തപുരം: തലസ്ഥാനത്തെ നോളജ് ആൻഡ് സ്പേസ് ടെക്നോളജി ഹബ്ബായി ഉയർത്തും. വിഴിഞ്ഞം തുറമുഖം കേന്ദ്രീകരിച്ച് ഗ്രീൻ ബങ്കറിംഗ് കേന്ദ്രവും കപ്പൽ നിർമ്മാണ-അറ്റകുറ്റപ്പണി കേന്ദ്രവും സ്ഥാപിക്കും. ബാലരാമപുരം-വിഴിഞ്ഞം ഭൂഗർഭ റെയിൽ, ഔട്ടർ റിംഗ് റോഡ് എന്നിവയ്ക്കായി 100 കോടി വകയിരുത്തി. ലൈറ്റ് മെട്രോയും സി.ഇ.ടി കോളേജിന് സർവ്വകലാശാലാ പദവിയും നൽകും.
കൊല്ലം: ധാതു സംസ്കരണ കേന്ദ്രമായി കൊല്ലത്തെ മാറ്റും. തുറമുഖ വികസനത്തോടൊപ്പം ചിന്നക്കടയിൽ സ്കൈ വാക്ക്, അർബൻ പാർക്ക് നിർമ്മാണത്തിന് 5 കോടി അനുവദിച്ചു. കോട്ടങ്കരയിൽ കോഴിമാംസ പ്രോസസിംഗ് പ്ലാന്റും പെറ്റ് ഫുഡ് ഫാക്ടറിയും സ്ഥാപിക്കും.
ആലപ്പുഴ: ഇന്ത്യയുടെ ബ്ലൂ ഇക്കണോമി തലസ്ഥാനമായി വികസിപ്പിക്കും. ഹരിപ്പാട് പുതിയ മെഡിക്കൽ കോളേജിനായി 100 കോടി രൂപ വകയിരുത്തി. തീരദേശ ടൂറിസം സർക്യൂട്ടും പാതിരാമണൽ ദ്വീപ് വികസനത്തിനായുള്ള മാസ്റ്റർ പ്ലാനും നടപ്പിലാക്കും.
എറണാകുളം: കൊച്ചിയിൽ ‘ചിത്രനഗരം’ ഫിലിം സിറ്റി സ്ഥാപിക്കാൻ 100 കോടി അനുവദിച്ചു. കൊച്ചി-ആലുവ-പെരുമ്പാവൂർ മേഖലയിൽ ഗ്ലോബൽ ഫർണിച്ചർ ഹബ്ബ്, ആർബിട്രേഷൻ കോടതി, കൺവെൻഷൻ സെന്റർ എന്നിവ വരുന്നു. എറണാകുളം മെഡിക്കൽ കോളേജ് നവീകരണത്തിനും ഗോശ്രീ-ബോൾഗാട്ടി പാലത്തിനുമായി തുക വകയിരുത്തി.
തൃശ്ശൂർ: കൊച്ചി-തൃശ്ശൂർ ബെൽറ്റ് ആഭരണ നിർമ്മാണ ഇടനാഴിയാക്കും. തൃശ്ശൂരിൽ ജോൺസൺ മ്യൂസിക് അക്കാദമിക്കായി 5 കോടിയും തേക്കിൻകാട് മൈതാന നവീകരണത്തിന് 10 കോടിയും നൽകി.
കോഴിക്കോട്: എം.ടി. വാസുദേവൻ നായർ കൾച്ചറൽ പാർക്കിനായി 50 കോടി വകയിരുത്തി. ലൈറ്റ് മെട്രോ പദ്ധതിയും, സൈബർ പാർക്കിന്റെ നിലവാരം ഉയർത്തലും നടപ്പിലാക്കും. ഉരുൾപൊട്ടൽ ബാധിതർക്കായി ‘വിലങ്ങാട് പാക്കേജ്’ (5 കോടി) പ്രഖ്യാപിച്ചു.
മലപ്പുറം: താലൂക്ക് ആശുപത്രിയെ സൂപ്പർ സ്പെഷ്യാലിറ്റി ആശുപത്രിയാക്കാൻ 5 കോടിയും, കാൻസർ സെന്ററിന് 10 കോടിയും നൽകി. പൊന്നാനിയിൽ തിണ്ടീസ് കൾച്ചറൽ ബിനാലെയും തീരസംരക്ഷണ പദ്ധതികളും നടപ്പിലാക്കും.
വയനാട്: ട്രൈബൽ സർവ്വകലാശാലയ്ക്കും തദ്ദേശീയ വിജ്ഞാന മേഖലയ്ക്കുമായി 50 കോടി നീക്കിവെച്ചു. ‘ബ്രാൻഡ് വയനാട്’ ടൂറിസം പദ്ധതിയും സുൽത്താൻ ബത്തേരിയിൽ ഗവൺമെന്റ് ആർട്സ് & സയൻസ് കോളേജും വരുന്നു.
കാസർഗോഡ് മെഡിക്കൽ കോളേജ് വികസനവും മഞ്ചേശ്വരം മിനി സിവിൽ സ്റ്റേഷനും, ഇടുക്കി മെഡിക്കൽ കോളേജ് വികസനവും മൂന്നാർ ‘ഗ്രീൻ മാർഷൽസ്’ പദ്ധതിയും, പാലക്കാട് ഒറ്റപ്പാലം കോടതി സമുച്ചയവും തൃത്താല കെ.ആർ. നാരായണൻ അക്കാദമിയും, പത്തനംതിട്ട റിംഗ് റോഡും ജയിൽ നിർമ്മാണവും, കോട്ടയം സ്കൈ വാക്ക്, കണ്ണൂർ അഴീക്കൽ തുറമുഖ വികസനം, തളിപ്പറമ്പ് ജയിൽ നിർമ്മാണം എന്നിവയും ബജറ്റിൽ ഉൾപ്പെടുത്തിയിട്ടുണ്ട്.
Story Summary
The 2026-27 state budget, presented by Chief Minister V.D. Satheesan, allocates substantial funds for district-specific development projects across Kerala. From major infrastructure hubs in Thiruvananthapuram and Kochi to the cultural park in Kozhikode and the tribal university in Wayanad, the budget aims to boost economic growth and welfare through strategic regional investments.
