കലാമണ്ഡലം കൃഷ്ണൻകുട്ടിപൊതുവാൾ ജന്മവാർഷികാഘോഷവും കലാസാഗർ പുരസ്‍കാര സമർപ്പണവും മെയ് 28ന്
കഥകളി സാർവ്വഭൗമനും കലാസാഗർ സ്ഥാപകനുമായിരുന്ന കലാമണ്ഡലം കൃഷ്ണൻകുട്ടി പൊതുവാളുടെ ജന്മവാർഷികം ഒരു പിറന്നാളിന്റെ ഓര്മ്മ 2023 മെയ് 28ആം തിയതി വാഴേങ്കട കുഞ്ചുനായർ ട്രുസ്ടിന്റെയും കേന്ദ്ര സാംസ്‌കാരിക വകുപ്പിന്റെയും സഹകരണത്തോടെ കാറൽമണ്ണ വാഴേങ്കട കുഞ്ചുനായർ ട്രസ്റ്റ് ഹാളിൽ കലാസാഗർ ആഘോഷിക്കുന്നു. കലാമണ്ഡലം കൃഷ്ണൻകുട്ടി പൊതുവാളുടെ സ്മരണാർത്ഥം കലാസാഗർ ഏർപ്പെടുത്തിയ പുരസ്‌കാരങ്ങൾ തദവസരത്തിൽ നൽകുന്നതാണ്.
മെയ് 28നു ഞായറാഴ്ച വൈകുന്നേരം 5 മണിക്ക് ആരംഭിക്കുന്ന അനുസ്മരണ യോഗത്തിന് സ്വാഗതം ശ്രീ കലാമണ്ഡലം ഉണ്ണികൃഷ്ണൻ നിർവഹിക്കും. ശ്രീ കെ ബി രാജ് ആനന്ദ് ( ചെയർമാൻ വാഴേങ്കട കുഞ്ചു നായർ ട്രസ്റ്റ് ) ആഘോഷ പരിപാടിയുടെ ആമുഖവും വിശിഷ്ടാധികളെയും കലാസാഗർ പുപുരസ്‌കൃതരെയും സദസ്സിനു പരിചയപ്പെടുത്തും. ഡോക്ടർ ടി എസ മാധവൻകുട്ടിയുടെ (പ്രസിഡന്റ് വാഴേങ്കട കുഞ്ചു നായർ ട്രസ്റ്റ്) അധ്യക്ഷതയിൽ ചേരുന്ന അനുസ്മരണ യോഗത്തിനു ഡോക്ടർ എം വി നാരായണൻ, വൈസ് ചാന്സല്ർ, കേരള കലാമണ്ഡലം ഉദ്‌ഘാടനം ചെയ്യും. ഡോക്ടർ കെ ജി പൗലോസ്, മുൻ വൈസ് ചാന്സല്ർ, കേരള കലാമണ്ഡലം വിശിഷ്ടസാന്നിദ്ധ്യം അലങ്കരിക്കുന്ന വേദിയിൽ ശ്രീ വി രാമൻകുട്ടി, ശ്രി എം ജെ ശ്രീചിത്രൻ സ്‌മൃതിഭാഷണം ചെയ്യും. ശ്രീ വി കലാധരൻ മുഖ്യ പ്രഭാഷകനാകും. തുടർന്ന് 2023ലെ കലാസാഗർ പുരസ്കാരസമർപ്പണം. കലാസാഗർ പ്രസിഡന്റ് ശ്രീ എം. പി. മോഹനൻ നന്ദി രേഖപ്പെടുത്തും.
പുരസ്കാരസമർപ്പണത്തിനു ശേഷം കലാമണ്ഡലം കൃഷ്ണൻകുട്ടി പൊതുവാൾ രചനയും സംവിധാനവും നിർവഹിച്ച ഭീഷ്മപ്രതിജ്ഞ ആട്ടക്കഥയിൽ കഥകളിയിലെ ദേവഭാവം ശ്രീ കോട്ടക്കൽ ദേവദാസ് ശന്തനു മഹാരാജാവായും, ശ്രീ. വെള്ളിനേഴി ഹരിദാസൻ സത്യവതിയായു, കളിയരങ്ങിലെ നിറ സാനീദ്ധ്യം ശ്രീ പീശപ്പിള്ളി രാജീവ് ഗംഗാദത്തനായും, യുവ കലാകാരന്മാരിൽ ഏറെ ശ്രദ്ധ പിടിച്ചുപറ്റിയ ശ്രീ കലാമണ്ഡലം നീരജ് ദാശരാജാവായും വേഷമിടുമ്പോൾ ശ്രീ അത്തിപ്പറ്റ രവിയും ശ്രീ നെടുമ്പുള്ളി രാംമോഹനനും സംഗീതം നൽകുന്നു. ശ്രീ കോട്ടക്കൽ വിജയരാഘവനും ശ്രീ കലാമണ്ഡലം സുധീഷ് പാലൂരുo മേളമൊരുക്കുന്നു. കലാമണ്ഡലം ശ്രീജിത്ത് ചുട്ടിയും, ശ്രീ ബാലൻ, ശ്രീ രാമകൃഷ്ണൻ, ശ്രീ കുട്ടൻ (അണിയറ) തുടങ്ങിയവർ പങ്കെടുക്കുന്ന കഥകളിക്കു ചമയമൊരുക്കുന്നതു വാഴേങ്കട കുഞ്ചു നായർ ട്രസ്റ്റ് ആണ്.