ശബരിമല തീർത്ഥാടകാരിൽ നിന്ന് കെഎസ്ആർടിസി അമിതനിരക്ക് ഈടാക്കിയ സംഭവം; ഇടപെട്ട് കോമ്പറ്റീഷൻ കമ്മീഷൻ ഓഫ് ഇന്ത്യ
May 25, 2023, 20:10 IST
![ശബരിമല തീർത്ഥാടകാരിൽ നിന്ന് കെഎസ്ആർടിസി അമിതനിരക്ക് ഈടാക്കിയ സംഭവം; ഇടപെട്ട് കോമ്പറ്റീഷൻ കമ്മീഷൻ ഓഫ് ഇന്ത്യ](https://timeskerala.com/static/c1e/client/91214/uploaded/8910eb3b9c2fa1d4e2f5dfa7822de572.jpg)
ശബരിമല തീർഥാടകരിൽ നിന്ന് കെഎസ്ആർടിസി അമിതനിരക്ക് ഈടാക്കിയ നടപടിയിൽ ഇടപെട്ട് കോമ്പറ്റീഷൻ കമ്മീഷൻ ഓഫ് ഇന്ത്യ. സംസ്ഥാന സർക്കാരിനും കെഎസ്ആർടിസിക്കും സിസിഐ നോട്ടീസ് അയച്ചു. നാലാഴ്ചക്കകം മറുപടി നൽകാനാണ് നിർദേശം നൽകിയിരിക്കുന്നത് .
നിലക്കൽ – പമ്പ റൂട്ട് അടക്കം 31 റൂട്ടുകളിൽ , ശബരിമല സീസൺ സമയത്തും അല്ലാത്തപ്പോഴും ഈടാക്കുന്ന ചാർജ് അടക്കമുള്ള 9 ചോദ്യങ്ങളിൽ വിശദമായ റിപ്പോർട്ട് നൽകാനാണ് സിസിഐ ആവശ്യപ്പെട്ടിരിക്കുന്നത്. സംസ്ഥാന സർക്കാരു കെഎസ്ആർടിസിയും നൽകുന്ന റിപ്പോർട്ട് കണക്കിലെടുത്താകും, ശബരിമല തീർത്ഥാടകർക്കുള്ള നിരക്ക് പുന പരിശോധിക്കുന്ന കാര്യത്തിൽ കോമ്പറ്റീഷൻ കമ്മീഷൻ തീരുമാനമെടുക്കുക.
![](https://timeskerala.com/static/c1e/static/themes/16/91214/3752/images/New-Creative-.png)
തീർഥാടകരിൽ നിന്ന് നിലയ്ക്കൽ മുതൽ പമ്പ വരെ കെഎസ്ആർടിസി അമിത നിരക്ക് ഈടാക്കുന്നതായി നേരത്തെ തന്നെ ആക്ഷേപം ഉയർന്നിരുന്നു. നിരക്ക് കുറയ്ക്കണമെന്ന് ആവശ്യപ്പെട്ട് വിവിധ സംഘടനകളും രംഗത്ത് വന്നിരുന്നു. ഈ വിഷയത്തിലാണ് കോമ്പറ്റീഷൻ കമ്മീഷൻ ഓഫ് ഇന്ത്യയുടെ ഭാഗത്ത് നിന്നും ഇടപെടൽ ഉണ്ടായിരിക്കുന്നത്. സുപ്രിം കോടതി അഭിഭാഷകൻ ഷൈൻ പി ശശിധരന്റെ പരാതിയിലാണ് കോമ്പറ്റീഷൻ കമ്മീഷന്റെ ഇടപെടൽ.