ബസിൽനിന്നു വീണ് വീട്ടമ്മയ്ക്ക് ഗുരുതര പരിക്ക്
![ബസിൽനിന്നു വീണ് വീട്ടമ്മയ്ക്ക് ഗുരുതര പരിക്ക്](https://timeskerala.com/static/c1e/client/91214/uploaded/04c90356a34cdd6ec119de5054f0c0b4.jpg)
പാലക്കാട്: സ്വകാര്യ ബസിന്റെ തുറന്നുവച്ച വാതിലിലൂടെ വീണ് വീട്ടമ്മയ്ക്ക് പരിക്ക്. കിഴക്കഞ്ചേരി മൂലംകോട് പക്കിരിക്കുളമ്പ് ചേരാംപാടം വീട്ടില് മുംതാജിനാണ് (49) ഗുരുതരമായി പരിക്കേറ്റത്. മുംതാജിന്റെ ബന്ധു വടക്കഞ്ചേരി തെന്നാമരം വീട്ടില് ഷൈലയ്ക്കും മറ്റൊരു യാത്രികയ്ക്കും ബസിനുള്ളില് വീണ് പരിക്കേറ്റിട്ടുണ്ട്. സംഭവം നടന്ന ശേഷം മുംതാജിനെ ആശുപത്രിയില് എത്തിക്കാതെ വഴിയിയില് ഉപേക്ഷിച്ച് ബസ് ജീവനക്കാര് പോയിരുന്നതായി ആരോപണമുണ്ട്.
![](https://timeskerala.com/static/c1e/static/themes/16/91214/3752/images/New-Creative-.png)
മുംതാജും ബന്ധുവായ ഷൈലയും വടക്കഞ്ചേരിയില്നിന്ന് പാലക്കാട്ടേയ്ക്ക് പോകുന്നതിനിടെ ശനിയാഴ്ച രാവിലെ എട്ടരയോടെ ദേശീയപാത ചരപ്പറമ്പിന് സമീപമായിരുന്നു അപകടം സംഭവിച്ചത്. ചിതലിയില്നിന്ന് ഒരു യാത്രക്കാരി ബസില് കയറിയ ശേഷം വാതില് അടച്ചിരുന്നില്ല. മറ്റൊരു ബസുമായി മത്സരിച്ച ബസ് വെള്ളപ്പാറയ്ക്ക് സമീപം പെട്ടെന്ന് നിര്ത്താനായി ബ്രേക്ക് ചവിട്ടിയപ്പോള് മുംതാജ് ബസില് നിന്ന് റോഡിലേക്ക് തലയടിച്ചു വീഴുകയായിരുന്നു. മുംതാജ് ജില്ലാ ആശുപത്രിയിൽ ചികിത്സയിലാണ്.
സംഭവത്തിൽ മുംതാജിന്റെ ബന്ധു പോലീസില് പരാതി നല്കി. പിന്നാലെ ബസ് ഡ്രൈവര് രാജീവിനെതിരെ കുഴല്മന്ദം പോലീസ് കേസെടുത്തു. വീണ ഉടനേ എണീറ്റ മുംതാജ് കുഴപ്പമില്ലെന്നു പറഞ്ഞതിനാലാണ് ബസ് വിട്ടുപോയതെന്നാണ് ബസ് ജീവനക്കാർ പറഞ്ഞു.