തൃശൂർ : വില്ലടം, വിൽവട്ടം, നടത്തറ, പൂച്ചട്ടി തുടങ്ങിയ മേഖലകളിൽ ഇന്ന് രാവിലെയുണ്ടായ മിന്നൽ ചുഴലിയിൽ വ്യാപക നാശനഷ്ടം. അതിശക്തമായ കാറ്റിൽ മരങ്ങൾ കടപുഴകി വീഴുകയും വീടുകൾക്കും വാഹനങ്ങൾക്കും കേടുപാടുകൾ സംഭവിക്കുകയും ചെയ്തു.(Flash Whirlwind Hits Thrissur Causes Major Damage Near School)
പൂച്ചട്ടി ഭാരതീയ വിദ്യാഭവൻ സ്കൂളിന് സമീപമാണ് മിന്നൽ ചുഴലി ഏറ്റവും കൂടുതൽ നാശം വിതച്ചത്. രാവിലെ 8.45-ഓടെയാണ് ചുഴലി വീശിയടിച്ചത്. 9 മണിക്കാണ് സ്കൂളിൽ ക്ലാസ് ആരംഭിക്കുന്നത്. ഈ സമയത്ത് വിദ്യാർത്ഥികൾ ഓട്ടോറിക്ഷകളിലും മറ്റും സ്കൂളിലെത്തുന്ന തിരക്കിലായിരുന്നു. മരങ്ങൾ വാഹനങ്ങൾക്ക് മുകളിലേക്ക് വീണെങ്കിലും, അധ്യാപകരും ഓട്ടോ ഡ്രൈവർമാരും ചേർന്ന് കുട്ടികളെ വേഗത്തിൽ തൊട്ടടുത്ത വീടുകളിലേക്കും സേഫ് ഹൗസുകളിലേക്കും മാറ്റിയതിനാൽ വലിയൊരു ദുരന്തം ഒഴിവായത്.
സ്കൂൾ പാർക്കിംഗിലെ നാല് തേക്കുമരങ്ങളും വലിയൊരു മാവും കടപുഴകി വീണു. മരം വീണ് മൂന്ന് ഓട്ടോറിക്ഷകളും ഒരു കാറും പൂർണ്ണമായും തകർന്നു. എൽകെജി വിഭാഗത്തിന്റെ സ്കൂൾ മേൽക്കൂര പൂർണമായും ഇളകിമാറി. മരങ്ങൾ റോഡിലേക്ക് വീണതിനെത്തുടർന്ന് പ്രദേശത്ത് ഗതാഗതം പൂർണ്ണമായും തടസ്സപ്പെട്ടു. ഫയർഫോഴ്സും നാട്ടുകാരും മണിക്കൂറുകൾ നീണ്ട പരിശ്രമത്തിനൊടുവിലാണ് മരങ്ങൾ മുറിച്ചുമാറ്റി ഗതാഗതം പുനസ്ഥാപിച്ചത്. അപകടത്തിൽ ആർക്കും പരിക്കേറ്റിട്ടില്ല എന്നത് വലിയ ആശ്വാസമായി.
Story Summary
A flash whirlwind struck several areas in Thrissur, including Villadam and Poochatty, causing significant damage and uprooting trees. Students at the Bharatiya Vidya Bhavan school narrowly escaped disaster as alert teachers and auto drivers moved them to safety moments before trees crushed several vehicles and damaged school infrastructure.
