കൊച്ചി: മലയാള സിനിമയിൽ തനതായ അഭിനയശൈലി കൊണ്ട് ചുരുങ്ങിയ കാലത്തിനുള്ളിൽ ശ്രദ്ധേയയായി മാറിയ നടിയാണ് ദിവ്യ പ്രഭ (Actress Divya Prabha interview marriage views). കരിയറിന്റെ തുടക്കത്തിൽ ചെറിയ വേഷങ്ങളിലൂടെ കടന്നുവന്ന് പിന്നീട് ടേക് ഓഫ്, കമ്മാരസംഭവം, തമാശ, മാലിക് തുടങ്ങിയ പ്രമുഖ ചിത്രങ്ങളിൽ മികച്ച പ്രകടനം കാഴ്ചവെക്കാൻ താരത്തിന് സാധിച്ചു. എന്നാൽ മഹേഷ് നാരായണൻ സംവിധാനം ചെയ്ത ‘അറിയിപ്പ്’ എന്ന ചിത്രത്തിലെ രശ്മി എന്ന കഥാപാത്രമാണ് ദിവ്യ പ്രഭയുടെ കരിയറിൽ വലിയൊരു വഴിത്തിരിവായത്. ഈ ചിത്രത്തിലെ പ്രകടനത്തിലൂടെ ലോകാർണോ ഇന്റർനാഷണൽ ഫിലിം ഫെസ്റ്റിവലിൽ മികച്ച നടിക്കുള്ള അന്താരാഷ്ട്ര നാമനിർദ്ദേശവും താരത്തെ തേടിയെത്തിയിരുന്നു.
പായൽ കപാഡിയ സംവിധാനം ചെയ്ത് കാൻ ഫിലിം ഫെസ്റ്റിവലിൽ ഗ്രാൻഡ് പ്രി അവാർഡ് കരസ്ഥമാക്കിയ ‘ഓൾ വീ ഇമാജിൻ ആസ് ലൈറ്റ്’ എന്ന ചിത്രത്തിലെ ദിവ്യ പ്രഭയുടെ പ്രകടനം ആഗോളതലത്തിൽ തന്നെ വലിയ രീതിയിൽ ചർച്ച ചെയ്യപ്പെട്ടു. തുടർന്ന് കൃഷാന്ത് സംവിധാനം ചെയ്ത ‘മസ്തിഷ്ക മരണം’ എന്ന ചിത്രത്തിലും ശക്തമായൊരു കഥാപാത്രത്തെ താരം അവതരിപ്പിച്ചു. ഇപ്പോഴിതാ തന്റെ വ്യക്തിജീവിതത്തെക്കുറിച്ചും വിവാഹം, പാർട്ണർഷിപ്പ് എന്നിവയെക്കുറിച്ചുമുള്ള തന്റെ നിലപാടുകൾ തുറന്നുപറഞ്ഞിരിക്കുകയാണ് നടി. ഒരു മാധ്യമത്തിന് നൽകിയ അഭിമുഖത്തിലാണ് ദിവ്യ പ്രഭ മനസ്സ് തുറന്നത്.
വിവാഹമെന്ന ചട്ടക്കൂടിനോട് തനിക്ക് യോജിക്കാൻ കഴിയില്ലെന്നാണ് ദിവ്യ പ്രഭ വ്യക്തമാക്കുന്നത്. “പാർട്ണർഷിപ്പ് ഇഷ്ടപ്പെടുന്നയാൾ തന്നെയാണ് ഞാൻ. ജീവിതത്തിൽ സന്തോഷവും സമാധാനവും എല്ലാമുണ്ട് ഇപ്പോൾ. അതിനെല്ലാം ഒപ്പം ചേർന്നുപോകുന്ന, പറ്റിയ ഒരാൾ വരുമ്പോൾ ഒന്നിക്കുമായിരിക്കും. പക്ഷേ, ഒരു എഗ്രിമെന്റിൽ ഒപ്പിട്ട് വിവാഹം ഉറപ്പിക്കുന്നതൊക്കെ ഞാൻ ചെയ്യുമെന്ന് തോന്നുന്നില്ല. കല്ല്യാണം എനിക്ക് സെറ്റല്ല. ഒരു പാർട്ണർ വേണം, അത്രേയുള്ളൂ,” താരം പറഞ്ഞു.
വിവാഹത്തെച്ചൊല്ലി കുടുംബത്തിൽ നിന്ന് യാതൊരുവിധ സമ്മർദ്ദവുമില്ലെന്നും താരം കൂട്ടിച്ചേർത്തു. അച്ഛൻ ഗണപതി അയ്യരും അമ്മ ലീലാമണിയും പ്രണയിച്ച് വിവാഹം കഴിച്ചവരാണ്. തന്റെ സഹോദരിമാരുടേതും പ്രണയവിവാഹമായിരുന്നു. അതുകൊണ്ടുതന്നെ വീട്ടുകാർക്കാർക്കും അറേഞ്ച്ഡ് മാര്യേജ് എന്ന രീതി പരിചയമില്ല. ഒന്നിനും ആരോടും അനുവാദം ചോദിക്കേണ്ട സാഹചര്യം വീട്ടിലുണ്ടായിട്ടില്ലെന്നും അത്രയും സ്വാതന്ത്ര്യത്തോടെയാണ് വളർന്നതെന്നും ദിവ്യ പ്രഭ പറയുന്നു. അഭിനയം ഒരു വരുമാനമാർഗ്ഗമായി തിരഞ്ഞെടുത്തപ്പോൾ അത് എത്രത്തോളം വിജയകരമാകും എന്ന കാര്യത്തിൽ മാത്രമാണ് മാതാപിതാക്കൾക്ക് ആശങ്കയുണ്ടായിരുന്നത്. എങ്കിൽപ്പോലും തന്റെ തീരുമാനങ്ങളിൽ അവർ ഇടപെട്ടിട്ടില്ലെന്നും താൻ തികച്ചും സ്വതന്ത്രയായി ജീവിക്കാൻ ഇഷ്ടപ്പെടുന്ന വ്യക്തിയാണെന്നും ദിവ്യ പ്രഭ വ്യക്തമാക്കി.
Story Summary: Acclaimed Malayalam actress Divya Prabha shared her views on marriage and relationships in a recent interview. Known for her stellar performances in ‘Ariyippu’, ‘All We Imagine as Light’, and ‘Masthishka Maranam’, the actress stated that legal marriage is not for her, though she values companionship and a mutually supportive partnership. She also credited her progressive family background for giving her the independence to make her own life choices.
