മാന്നനൂർ ട്രാക്കിന് സമീപം അഗ്നിബാധ; ട്രെയിൻ ഗതാഗതം തടസ്സപ്പെട്ടു
Feb 12, 2024, 09:55 IST
ഒറ്റപ്പാലം: മാന്നനൂരിൽ റെയിൽവേ ട്രാക്കിനോട് ചേർന്നുണ്ടായ അഗ്നിബാധയിൽ ട്രെയിൻ ഗതാഗതം തടസ്സപ്പെട്ടു. രാവിലെ 11.30 ഓടെയാണ് പ്രദേശവാസികളുടെ ശ്രദ്ധയിൽ തീ പെടുന്നത്. വെള്ളത്തിന്റെ ലഭ്യതക്കുറവ് മൂലം മണിക്കൂറുകൾ നീണ്ട ശ്രമത്തിനൊടുവിലാണ് തീയണക്കാനായത്. അഗ്‌നിരക്ഷ സേനയുടെ അറിയിപ്പിന്റെ അടിസ്ഥാനത്തിൽ റെയിൽവേ അധികൃതർ ഷൊർണൂർ-പാലക്കാട് റൂട്ടിൽ മാന്നനൂർ വഴി കടന്നുപോകുന്ന ട്രെയിനുകൾക്ക് നിയന്ത്രണം ഏർപ്പെടുത്തി. റബർ ഷീറ്റ് പൊതിഞ്ഞ തോട്ടി കൊണ്ടടിച്ചാണ് കൂടുതൽ പ്രദേശങ്ങളിലേക്ക് തീ പടരുന്നത് ഒരുവിധം തടഞ്ഞത്. തീയും പുകയും റെയിൽവേ ട്രാക്കിലേക്ക് പടർന്നതാണ് ട്രെയിൻ സഞ്ചാരത്തെ ബാധിച്ചത്. അകലെയുള്ള വീടുകളിൽനിന്നും കാനുകളിലും മറ്റും വെള്ളമെത്തിച്ചാണ് അണക്കാൻ ശ്രമം തുടർന്നത്. പുക അൽപ്പം ശമിച്ച ശേഷമാണ് സമീപത്ത് ചെറിയകുളം രക്ഷാപ്രവർത്തകരുടെ കണ്ണിൽപ്പെട്ടത്. ഏതാണ്ട് മുക്കാൽ കിലോമീറ്ററോളം ദൂരം റെയിലോരവും വയൽ പ്രദേശത്തെ മരങ്ങൾ അടക്കം കുറ്റിച്ചെടികളും അഗ്നിക്കിരയായി.