കൊച്ചി: മാസപ്പടി കേസിന്റെ അന്വേഷണവുമായി ബന്ധപ്പെട്ട് പരിശോധനയ്ക്കെത്തിയ എൻഫോഴ്സ്മെന്റ് ഡയറക്ടറേറ്റ് (ED Case) ഉദ്യോഗസ്ഥരെ ആക്രമിച്ച കേസിൽ ഒരു പ്രതിക്ക് ജാമ്യം അനുവദിച്ചു. കേസിലെ ഒമ്പതാം പ്രതിയായ ഹരീഷ് കുമാറിനാണ് കോടതിയുടെ ജാമ്യാനുകൂല്യം ലഭിച്ചത്.
കേസിൽ ജാമ്യം നേടുന്ന ആദ്യ പ്രതിയാണ് ഹരീഷ് കുമാർ. പ്രതിയെ വീണ്ടും കസ്റ്റഡിയിൽ വാങ്ങി ചോദ്യം ചെയ്യേണ്ട ആവശ്യമില്ലെന്ന് പ്രോസിക്യൂഷനും അന്വേഷണ സംഘവും കോടതിയെ അറിയിച്ചതിനെ തുടർന്നാണ് ജാമ്യം അനുവദിച്ചത്.
ഇതിനിടെ, മാസപ്പടി കേസിന്റെ അന്വേഷണത്തിൽ നിർണായകമായ രേഖകൾ ഇഡിക്ക് ലഭിച്ചതായി റിപ്പോർട്ടുകളുണ്ട്. എസ്എഫ്ഐഒ (സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ്) സമർപ്പിച്ച കുറ്റപത്രവുമായി ബന്ധപ്പെട്ട 134 രേഖകളാണ് അന്വേഷണ ഏജൻസിയുടെ കൈവശമെത്തിയത്.
ലഭിച്ച പുതിയ രേഖകളുടെ അടിസ്ഥാനത്തിൽ കേസിലെ തുടർനടപടികൾ വേഗത്തിലാക്കാനാണ് ഇഡിയുടെ നീക്കം. എക്സാലോജിക് കമ്പനിയുടെ ഉടമയായ വീണാ വിജയനെ വീണ്ടും ചോദ്യം ചെയ്യുന്നതിനും ഈ രേഖകൾ അന്വേഷണത്തിൽ പ്രധാന തെളിവുകളായി പരിഗണിക്കപ്പെടുമെന്നാണ് വിവരം.
രേഖകൾ കൈമാറുന്നതുമായി ബന്ധപ്പെട്ട് നേരത്തെ കോടതി ഉത്തരവ് ഉണ്ടായിരുന്നെങ്കിലും എസ്എഫ്ഐഒയിൽ നിന്ന് അവ ലഭിക്കുന്നതിൽ കാലതാമസം നേരിട്ടിരുന്നു. കേസിന്റെ ഭാഗമായി ജൂൺ 29ന് വീണാ വിജയനെ വീണ്ടും ചോദ്യം ചെയ്യാനാണ് ഇഡി തീരുമാനിച്ചിരിക്കുന്നത്.
Story Summary:
A court granted bail to Harish Kumar, the ninth accused in the case related to the alleged attack on ED officials during the investigation of the massappadi case. Meanwhile, the ED has obtained 134 key documents linked to the SFIO chargesheet and is expected to use them in its continuing probe.
