പാരിസ്: ഫ്രാൻസിൽ ആദ്യമായി എബോള വൈറസ് ബാധ സ്ഥിരീകരിച്ചതായി ആരോഗ്യ മന്ത്രാലയം അറിയിച്ചു (France Ebola Case). രോഗബാധിത മേഖലയായ കോംഗോയിൽ സേവനമനുഷ്ഠിച്ച ശേഷം നാട്ടിലേക്ക് മടങ്ങിയെത്തിയ ഒരു ഡോക്ടർക്കാണ് വൈറസ് ബാധ കണ്ടെത്തിയത്. രോഗലക്ഷണങ്ങൾ കണ്ടെത്തിയതിനെ തുടർന്ന് ഇയാളെ ഉടൻ തന്നെ ഐസൊലേഷനിലേക്ക് മാറ്റുകയും പ്രത്യേക ചികിത്സാ സൗകര്യങ്ങളുള്ള ആശുപത്രിയിൽ പ്രവേശിപ്പിക്കുകയും ചെയ്തു.
രോഗിയുടെ ആരോഗ്യനില നിലവിൽ തൃപ്തികരമാണെന്നും പൊതുജനങ്ങൾക്ക് അടിയന്തര ഭീഷണിയില്ലെന്നും ഫ്രഞ്ച് ആരോഗ്യ അധികൃതർ വ്യക്തമാക്കി. രോഗബാധിതനുമായി അടുത്ത സമ്പർക്കം പുലർത്തിയവരെ കണ്ടെത്തുന്നതിനുള്ള നടപടികൾ പുരോഗമിക്കുകയാണ്. ഇവരെ മുൻകരുതൽ നടപടിയുടെ ഭാഗമായി 21 ദിവസത്തേക്ക് നിരീക്ഷണത്തിലും ഹോം ഐസൊലേഷനിലും പാർപ്പിക്കും.
അതേസമയം, കോംഗോയിലെ ഇറ്റൂരി പ്രവിശ്യയിൽ എബോള വ്യാപനം ഗുരുതരമായി തുടരുകയാണ്. ജൂൺ 21 വരെയുള്ള കണക്കുകൾ പ്രകാരം 1,048 രോഗബാധിതരും 267 മരണങ്ങളും റിപ്പോർട്ട് ചെയ്തിട്ടുണ്ട്. രോഗവ്യാപനം അയൽരാജ്യമായ ഉഗാണ്ടയിലേക്കും വ്യാപിച്ചിട്ടുണ്ടെന്നും അവിടെ 20 കേസുകളും രണ്ട് മരണങ്ങളും സ്ഥിരീകരിച്ചതായും റിപ്പോർട്ടുകളുണ്ട്.
രോഗവ്യാപനത്തിന്റെ പശ്ചാത്തലത്തിൽ മെയ് 15ന് ലോകാരോഗ്യ സംഘടന എബോളയെ പകർച്ചവ്യാധിയായി പ്രഖ്യാപിച്ചിരുന്നു. തുടർന്ന് മെയ് 17ന് അന്താരാഷ്ട്ര ആരോഗ്യ അടിയന്തരാവസ്ഥയും പ്രഖ്യാപിക്കപ്പെട്ടു.
നിലവിൽ വ്യാപിക്കുന്ന വൈറസ് ‘ബുണ്ടിബുഗ്യോ’ (Bundibugyo) എന്ന അപൂർവ എബോള വകഭേദമാണെന്ന് വിദഗ്ധർ വ്യക്തമാക്കുന്നു. ഈ വൈറസിനെതിരെ നിലവിൽ അംഗീകൃത വാക്സിനുകളോ പ്രത്യേക ചികിത്സാരീതികളോ ലഭ്യമല്ല. കൂടാതെ കോംഗോയിലെ ഇറ്റൂരിയുടെയും സമീപ കിവു പ്രവിശ്യകളുടെയും സായുധ സംഘർഷങ്ങളും മാനുഷിക സഹായ പ്രവർത്തനങ്ങളിലെ പ്രതിസന്ധികളും രോഗപ്രതിരോധ നടപടികൾക്ക് വെല്ലുവിളിയാകുന്നുണ്ട്.
Story Summary: France has confirmed its first Ebola case in a doctor who recently returned from the outbreak-hit region of Congo. Health authorities have isolated the patient and launched contact-tracing measures as the Bundibugyo strain continues to spread in Central Africa.
