ഇന്ന് മുതൽ പൊലീസ് സുരക്ഷയിൽ ഡ്രൈവിങ് ടെസ്റ്റ്; അപേക്ഷകർക്ക് സ്വന്തം വാഹനങ്ങളിലെത്താം
May 10, 2024, 08:52 IST
തിരുവനന്തപുരം: പ്രതിഷേധങ്ങളും എതിർപ്പുകളും അവഗണിച്ച് ഡ്രൈവിങ് ടെസ്റ്റ് പരിഷ്കാരങ്ങളുമായി മുന്നോട്ടുപോകാൻ ഗതാഗതവകുപ്പിന്റെ തീരുമാനം. വെള്ളിയാഴ്ച മുതൽ പൊലീസ് സുരക്ഷയിൽ ടെസ്റ്റ് നടത്താനാണ് വകുപ്പ് ഒരുങ്ങുന്നത്. പരമാവധി സ്ഥലങ്ങളിൽ സർക്കാർ നിയന്ത്രണത്തിലെ ഭൂമിയിലോ സന്നദ്ധത അറിയിക്കുന്ന സ്വകാര്യ ഭൂമിയിലോ ടെസ്റ്റ് ഗ്രൗണ്ടുകൾ സജ്ജമാക്കാൻ ആർ.ടി.ഒമാർക്ക് ഗതാഗത മന്ത്രി ഗണേഷ് കുമാർ നിർദേശം നൽകിയിട്ടുണ്ട്. അപേക്ഷകർക്ക് സ്വന്തം വാഹനങ്ങളിലെത്താം. ടെസ്റ്റിനുള്ള വാഹനം ലഭ്യമാകാത്ത സ്ഥലങ്ങളിൽ അവ വാടകക്കെടുത്ത് മുടക്കം കൂടാതെ നടത്തും. സ്ലോട്ട് ലഭിച്ച അപേക്ഷകർ വെള്ളിയാഴ്ച മുതൽ ടെസ്റ്റിന് ഹാജരാകണം. അപേക്ഷകരെ ഗ്രൗണ്ടുകളിൽ തടസ്സപ്പെടുത്താൻ അനുവദിക്കില്ല. ബാഹ്യശക്തികളുമായി ചേർന്ന് നിസ്സാര കാരണങ്ങൾ പറഞ്ഞ് ടെസ്റ്റിന് എത്തുന്നവരെ മടക്കി അയക്കാൻ ഉദ്യോഗസ്ഥർ ശ്രമിച്ചാൽ കർശന നടപടിയെടുക്കാൻ മന്ത്രി നിർദേശം നൽകി.ഇപ്പോൾ നടക്കുന്ന സമരം പൊതുജനതാൽപര്യത്തിനും കോടതി നിർദേശങ്ങൾക്കും എതിരാണെന്ന് ഗതാഗത മന്ത്രിയുടെ ഓഫിസ് പുറത്തിറക്കിയ വാർത്തക്കുറിപ്പിൽ പറയുന്നു .