കോടഞ്ചേരിയില്‍ ഡോക്ടര്‍ക്ക് രോഗിയുടെ മര്‍ദനം
കോഴിക്കോട്: കോടഞ്ചേരിയില്‍ ചികിത്സയ്‌ക്കെത്തിയ രോഗി ഡോക്ടറെയും ആശുപത്രി ജീവനക്കാരെയും മര്‍ദിച്ചു. ഹോളിക്രോസ് ആശുപത്രിയിലെ ഡോ.സുസ്മിത്ത് അടക്കമുള്ളവര്‍ക്കാണ് മര്‍ദനമേറ്റത്. കല്ലെടുത്ത് ഡോക്ടറുടെ തലയ്ക്കടിക്കാന്‍ ഉള്‍പ്പെടെ ശ്രമം നടത്തിയെന്നും പരാതിയുണ്ട്.
ശനിയാഴ്ച രാത്രി പന്ത്രണ്ടോടെയാണ് സംഭവം നടന്നത്. വാഹനാപകടത്തില്‍ പരിക്കേറ്റ് ആശുപത്രിയിലെത്തിച്ച കോടഞ്ചേരി സ്വദേശിയാണ് ആക്രമണം നടത്തിയത്. അക്രമി അമിതമായി മദ്യപിച്ചിരുന്നെന്നും പരാതിയില്‍ പറയുന്നു. ഇയാള്‍ക്ക് പ്രാഥമിക ചികിത്സ നല്‍കിയെങ്കിലും വേണ്ടത്ര ചികിത്സ കിട്ടിയില്ലെന്ന് പറഞ്ഞ് ഇയാള്‍ ഡോക്ടറെ കൈയേറ്റം ചെയ്യുകയായിരുന്നു. ഇയാളെ തള്ളിമാറ്റിയാണ് ഡോക്ടര്‍ രക്ഷപെട്ടത്. സംഭവത്തില്‍ ആശുപത്രി അധികൃതര്‍ പോലീസില്‍ പരാതി നല്‍കിയിട്ടുണ്ട്.