ആക്കുളം ടൂറിസ്റ്റ് വില്ലേജിലെ ചില്ലുപാലത്തിൽ  ഉദ്ഘാടനത്തിന് മുന്നോടിയായി വിള്ളലുകൾ

ആക്കുളം ടൂറിസം വില്ലേജിൽ ടൂറിസം വികസന പദ്ധതിയുടെ ഭാഗമായി നിർമിച്ച ഗ്ലാസ് പാലത്തിൽ വിള്ളൽ രൂപപ്പെട്ടു. പാലത്തിലേക്ക് പോകുന്ന ഭാഗത്തെ ഗ്ലാസ് പാനലിൽ വിള്ളൽ ഉണ്ടായി. മൂന്ന് പാളികളുള്ള ഗ്ലാസ് ചില്ലുകൾ ആയുധം കൊണ്ട് അടിച്ച് തകർത്തതായി വികെ പ്രശാന്ത് എംഎൽഎ പറഞ്ഞു. സാമൂഹിക വിരുദ്ധരാണ് ഇതിന് പിന്നിലെന്നും അദ്ദേഹം അവകാശപ്പെട്ടു. ഡി.ടി.പി.സി.യുമായി ചേർന്ന് ചില്ലുപാലം നിർമിക്കുന്ന വട്ടിയൂർക്കാവ് യൂത്ത് ബ്രിഗേഡ് സംരംഭക സഹകരണ സംഘമാണ് ശ്രീകാര്യം പോലീസിൽ പരാതി നൽകിയത്.

ടൂറിസം രംഗത്തെ വൻ വികസന സാധ്യതകൾ കണക്കിലെടുത്താണ് ടൂറിസം വകുപ്പ് ഗ്ലാസ് പാലം നിർമിക്കുന്നത്. ഒന്നരക്കോടി രൂപ ചെലവിൽ നിർമിച്ച പാലത്തിന് 75 അടി ഉയരവും 52 മീറ്റർ നീളവുമുണ്ട്. ഒരേ സമയം 20 പേർക്ക് പാലത്തിലൂടെ യാത്ര ചെയ്യാം. മാർച്ച് 13ന് ഉദ്ഘാടനം നടത്താനിരുന്ന പാലം വർക്കലയിലെ ഫ്ലോട്ടിംഗ് ബ്രിഡ്ജ് തകർന്നതിനെ തുടർന്ന് ഉദ്ഘാടനം മാറ്റിവച്ചു.