ഗൾഫിലേക്ക് പോകാനിരുന്ന പ്രവാസിയെ കുടുക്കാൻ ഇറച്ചിയെന്ന വ്യാജേന കുപ്പിക്കുള്ളിൽ കഞ്ചാവ് നൽകി; സുഹൃത്ത് അറസ്റ്റിൽ
Feb 8, 2024, 14:09 IST
മലപ്പുറം: ഗൾഫിലേക്ക് പോകാനിരുന്ന പ്രവാസിയെ കേസിൽ കുടുക്കാൻ ഇറച്ചിയെന്ന വ്യാജേന കുപ്പിക്കുള്ളിൽ കഞ്ചാവ് നൽകിയ സംഭവത്തിൽ സുഹൃത്ത് അറസ്റ്റിൽ. മലപ്പുറം എടവണ്ണപ്പാറയിൽ നടന്ന സംഭവത്തിൽ, പരാതിയുടെ അടിസ്ഥാനത്തിൽ ഓമാനൂർ സ്വദേശി പള്ളിപ്പുറായ നീറയിൽ പി.കെ. ഷമീം (23)നെയാണ്‌ പോലീസ് അറസ്റ്റ് ചെയ്തത്. തിങ്കളാഴ്ച രാത്രിയാണ് കേസിനാസ്പദമായ സംഭവം. അവധി കഴിഞ്ഞ് ഗൾഫിലേക്ക് തിരച്ചുപോകാനിരുന്ന പ്രവാസി ഓമാനൂർ പള്ളിപ്പുറായ പാറപള്ളിയാളി ഫൈസലിനാണ് ഷമീം ഇറച്ചിയെന്ന വ്യാജേന കഞ്ചാവ് നൽകിയത്. ഗൾഫിലുള്ള മറ്റൊരു സുഹൃത്തിനെ ഏൽപ്പിക്കാൻ എന്ന് പറഞ്ഞാണ് ഷമീം ഇത് കൈമാറിയത്. യാത്രക്കുള്ള ലഗേജ് ഒരുക്കുന്നതിനിടെ ഷമീം നൽകിയ പെട്ടിയിലെ വസ്തുക്കൾ മാറ്റി പായ്ക്ക് ചെയ്യാൻ അഴിച്ചപ്പോഴാണ് ഫൈസലിന് ചതി മനസിലായത്.തുടർന്ന് വിശദമായ പരിശോധന നടത്തിയപ്പോൾ കുപ്പിയിലുള്ളത് കഞ്ചാവാണെന്ന് മനസിലായി. ഫൈസൽ ഉടൻതന്നെ വാഴക്കാട് സ്റ്റേഷനിലെത്തി പരാതി നൽകുകയായിരുന്നു.ഈ പരാതിയിലാണ് ഷമീം അറസ്റ്റിലായത്.