ആശുപത്രി പ്രവർത്തനം തടസ്സപ്പെടുത്തിയ പ്രതിക്ക് ഒരു വർഷം കഠിന തടവ്
മഞ്ചേരി: ആശുപത്രി പ്രവര്‍ത്തനം തടസ്സപ്പെടുത്തിയതിനും ജീവനക്കാരുടെ ഡ്യൂട്ടി തടസ്സപ്പെടുത്തിയതിനും പ്രതിക്ക് ഒരു വർഷം കഠിന തടവ് വിധിച്ചു. പൊന്നാനി മാളിയേക്കൽ സിദ്ദീഖിനെയാണ് (48) മഞ്ചേരി ഒന്നാം അഡീഷനൽ ജില്ല സെഷൻസ് കോടതി ജഡ്ജി എം. തുഷാർ ശിക്ഷിച്ചത്.
2022 ഡിസംബർ 14ന് ഉച്ചക്ക് രണ്ടിനാണ് കേസിനാസ്പദമായ സംഭവം നടന്നത്. പൊന്നാനി ഗവ. താലൂക്ക് ആശുപത്രിയില്‍ പ്രതി ബഹളം വെക്കുകയും ഡ്യൂട്ടി ഡോക്ടറായ പരാതിക്കാരിയെ അസഭ്യം പറയുകയും ചെയ്‌തെന്നാണ് പരാതി. കൂടാതെ ഡ്യൂട്ടി തടസ്സപ്പെടുത്തുകയും തടയാൻ ശ്രമിച്ച സെക്യൂരിറ്റി ജീവനക്കാരി മിനിയെ അസഭ്യം പറയുകയും കൈയില്‍ കരുതിയിരുന്ന കല്ലു കൊണ്ട് തലക്ക് എറിയുകയും ചെയ്തുവെന്നും പരാതിയിൽ പറയുന്നു.
