വിവാഹ തട്ടിപ്പ് കേസിൽ 10 വർഷം മുമ്പ് ജാമ്യത്തിലിറങ്ങി ഒളിവിൽപോയയാൾ പിടിയിൽ
Mar 16, 2023, 17:36 IST
മാവൂർ: 10 വർഷം മുമ്പ് ജാമ്യത്തിലിറങ്ങി ഒളിവിൽ പോയ വിവാഹ തട്ടിപ്പുകാരൻ പിടിയിൽ. തിരുവനന്തപുരം വിഴിഞ്ഞത്ത് താമസിക്കുന്ന ബിനു സക്കറിയ എന്ന 47-കാരനെയാണ് മാവൂർ പൊലീസ് അറസ്റ്റ് ചെയ്തത്. ഭാര്യ നിലവിലിരിക്കെ മറ്റൊരു സ്ത്രീയെ മറ്റൊരു പേരിൽ വിവാഹം കഴിക്കുകയും ആദ്യ ഭാര്യയെ ഉപദ്രവിക്കുകയും ചെയ്തതിന് 2013ൽ മാവൂർ പൊലീസ് ഇയാളെ അറസ്റ്റ് ചെയ്തിരുന്നു. മാവൂർ അടുവാട് താമസിച്ചിരുന്ന ആദ്യ ഭാര്യയുടെ പരാതിയിൽ മാവൂർ പൊലീസ് കേസെടുത്താണ് ഇയാളെ അറസ്റ്റ് ചെയ്തത്. തുടർന്ന് ജാമ്യത്തിലിറങ്ങിയ പ്രതി വിചാരണക്ക് ഹാജരാകാതെ പല ജില്ലകളിലായി മുങ്ങിനടക്കുകയായിരുന്നു. കോട്ടയം ജില്ലയിലുണ്ടെന്നറിഞ്ഞ് അവിടെയെത്തിയാണ് മാവൂർ പൊലീസ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.