പ്രതിഷേധ ധര്‍ണക്കിടെ എം.എൽ.എയുടെ വേദി തകര്‍ന്നു
Jan 25, 2023, 21:38 IST
തിരുവനന്തപുരം: നെയ്യാറ്റിന്‍കര മണ്ണക്കലില്‍ പ്രതിഷേധ ധര്‍ണ നടത്തിയ സ്റ്റേജ് തകര്‍ന്നുവീണു; മേല്‍ക്കൂരയില്ലാത്തതിനാല്‍ സ്റ്റേജിലുണ്ടായിരുന്നവര്‍ പരിക്കേല്‍ക്കാതെ രക്ഷപ്പെട്ടു. ചെവ്വാഴ്ച ഉച്ചക്ക് 12.30ഓടെ കെ. ആന്‍സലന്‍ എം.എൽ.എ ധര്‍ണ ഉദ്ഘാടനം ചെയ്ത് മടങ്ങാനൊരുങ്ങുമ്പോഴാണ് അപകടം സംഭവിച്ചത്.കഴക്കൂട്ടം-കാരോട് ബൈപാസ് റോഡിന് കുറുകെ മാവിളക്കടവിലേക്ക് പോകുന്ന റോഡില്‍ മേല്‍പാലം സ്ഥാപിക്കണമെന്നാവശ്യപ്പെട്ട് മണ്ണക്കലില്‍ നടത്തിയ ധര്‍ണക്കിടെയാണ് സ്റ്റേജ് തകര്‍ന്നത്. കയറുപൊട്ടി പലക താഴേക്ക് ഇളകിവീണതോടെ സ്റ്റേജ് നിലം പതിച്ചു. പരസ്പരം കൈകോര്‍ത്താണ് പരിക്കേല്‍ക്കാതെ സ്റ്റേജിലുണ്ടായിരുന്നവര്‍ രക്ഷപ്പെട്ടത്.