ഹർത്താൽ ദിനത്തിൽ ഹെൽമറ്റ് വെച്ച് ബസോടിച്ച് കെഎസ്ആർടിസി ഡ്രൈവർ; വീഡിയോ
കൊച്ചി: പോപ്പുലർ ഫ്രണ്ട് ആഹ്വാനം ചെയ്ത ഹർത്താലിനിടെ വ്യാപക അക്രമം. ഹർത്താൽ ദിനം സർവീസ് തുടങ്ങിയ കെഎസ്ആർടിസി ബസുകൾക്ക് നേരെ കല്ലേറുണ്ടായി. ഇതിനിടെ, ഹെൽമറ്റ് വെച്ച് കെഎസ്ആർടിസി ബസ് ഓടിക്കുന്ന ഡ്രൈവറുടെ വീഡിയോ വൈറലാകുകയാണ്.എറണാകുളം ആലുവ കെഎസ്ആർടിസി സ്റ്റാൻഡിൽ പുറപ്പെട്ട ബസിലെ ഡ്രൈവറുടെ വീഡിയോ ആണ് സമൂഹ മാധ്യമങ്ങളിൽ പ്രചരിക്കുന്നത്. സർവീസിനിടെ ഹർത്താൽ അനുകൂലികളുടെ ഭാഗത്തുനിന്ന് കല്ലേറുണ്ടായാൽ തല സുരക്ഷിതമാക്കാനാണ് ജീവനക്കാരൻ ഹെൽമറ്റ് വെച്ചിരിക്കുന്നത്.
ഈരാറ്റുപേട്ടയിൽ സംഘർഷം,സമരക്കാരെ അടിച്ചോടിച്ചു
സംസ്ഥാനത്ത് പോപ്പുലർ ഫ്രണ്ട് ആഹ്വാനം ചെയ്ത ഹർത്താൽ പുരോഗമിക്കുന്നതിനിടെ ഈരാറ്റുപേട്ടയിൽ സമരാനുകൂലികളും പോലീസുകാരും തമ്മിൽ സംഘർഷം. വാഹനങ്ങൾ തടയാൻ ശ്രമിച്ച സമരക്കാരെ പോലീസ് അടിച്ചോടിച്ചു. അക്രമാസക്തരായി നൂറുകണക്കിന് സമരക്കാരാണ് ഇവിടെ തടിച്ചു കൂടിയത്. ഇതിനിടെ ഇതുവഴി ബൈക്കിലെത്തിയ ആളെ പ്രവർത്തകർ മർദിച്ചു. സംഭവവുമായി ബന്ധപ്പെട്ട് അഞ്ച് പേരെ പോലീസ് കസ്റ്റഡിയിലെടുത്തിട്ടുണ്ട്. അതേസമയം, അക്രമസംഭവങ്ങളുടെ പശ്ചാത്തലത്തിൽ ഈരാറ്റുപേട്ടയിൽ നിന്നും 100 പോപ്പുലർ ഫ്രണ്ട് പ്രവർത്തകരെ പോലീസ് കരുതൽ തടങ്കലിലാക്കിയിട്ടുണ്ട്.