2026 ഫിഫ ലോകകപ്പിൽ അർജന്റീനയ്ക്ക് ഫിഫയുടെ പ്രത്യേക പരിഗണന ലഭിക്കുന്നുണ്ടെന്നും ടൂർണമെന്റ് അർജന്റീനയെ വിജയിപ്പിക്കാൻ വേണ്ടി ‘ഒത്തുകളി’ നടത്തുകയാണെന്നും വ്യാപകമായ ആരോപണങ്ങൾ ഉയരുന്നുണ്ട് (Lionel Scaloni on match fixing allegations). ലോകകപ്പ് സെമിഫൈനൽ ലക്ഷ്യമാക്കി മുന്നേറുന്ന അർജന്റീന ഇതുവരെ ലോകറാങ്കിംഗിൽ ആദ്യ പത്തിലുള്ള ഒരു ടീമിനെപ്പോലും നേരിട്ടിട്ടില്ല എന്നത് ഇതിന് കാരണമായി പലരും ചൂണ്ടിക്കാട്ടുന്നു. റൗണ്ട് ഓഫ് 16-ൽ ഈജിപ്തിനെതിരെ 3-2ന് വിജയിച്ചതിന് പിന്നാലെ, തങ്ങൾക്കെതിരെ നടന്ന റെഫറിംഗ് തീരുമാനങ്ങളിൽ വ്യാപക വിമർശനവുമായി ഈജിപ്ഷ്യൻ ക്യാമ്പ് രംഗത്തെത്തിയിരുന്നു.
ഈ ആരോപണങ്ങളോട് അർജന്റീനൻ പരിശീലകൻ ലയണൽ സ്കലോണി ശക്തമായി പ്രതികരിച്ചു. ഇത്തരം വിമർശനങ്ങൾ കളിക്കാരെ മാനസികമായി തളർത്തുന്നതിന് പകരം, കൂടുതൽ കരുത്തോടെ കളിക്കാൻ പ്രേരിപ്പിക്കുകയാണ് ചെയ്യുന്നതെന്ന് അദ്ദേഹം പറഞ്ഞു. “തുടർച്ചയായി രണ്ട് തവണ ലോകകപ്പ് കിരീടം നേടുന്നത് കാണാൻ ആഗ്രഹിക്കാത്തവരാണ് ഇത്തരത്തിലുള്ള ആരോപണങ്ങൾ ഉന്നയിക്കുന്നത്. ഈ വിമർശനങ്ങൾ ഞങ്ങൾക്ക് ഒരു പ്രചോദനമാണ്. കൂടുതൽ നന്നായി കളിക്കാൻ ഇത് ഞങ്ങളെ പ്രേരിപ്പിക്കുന്നു,” സ്കലോണി മാധ്യമങ്ങളോട് വ്യക്തമാക്കി.
1986-ൽ അർജന്റീന ലോകകപ്പ് നേടിയപ്പോഴും സമാനമായ രീതിയിൽ ‘ഫേവറിറ്റിസം’ ആരോപിക്കപ്പെട്ടിരുന്നുവെന്ന് അദ്ദേഹം ഓർമ്മിപ്പിച്ചു. അർജന്റീന ഏത് ടൂർണമെന്റിൽ കളിക്കുമ്പോഴും ഇത്തരത്തിലുള്ള വിവാദങ്ങൾ ഉയരാറുണ്ട്. ഇത് തികച്ചും സ്വാഭാവികമാണ്. മറ്റ് ടീമുകളെ പിന്തുണയ്ക്കുന്നവർക്ക് അർജന്റീന ജയിക്കുന്നത് ഇഷ്ടപ്പെടില്ലായിരിക്കാം. അർജന്റീന ജയിക്കുന്നത് തടയാൻ ശ്രമിക്കുന്നവർ ഉള്ളതുകൊണ്ട് തന്നെയാണ് ഞങ്ങൾ കൂടുതൽ ശ്രദ്ധയോടെ കളിക്കുന്നതെന്നും അദ്ദേഹം കൂട്ടിച്ചേർത്തു.
വിവാദം സൃഷ്ടിക്കുന്ന വാർ (VAR) തീരുമാനങ്ങളെക്കുറിച്ചും സ്കലോണി പ്രതികരിച്ചു. ടൂർണമെന്റിന് മുൻപ് തന്നെ വാർ ഉപയോഗത്തെക്കുറിച്ച് വ്യക്തമായ നിർദ്ദേശങ്ങൾ ലഭിച്ചിരുന്നുവെന്നും അത് കൃത്യമായി പാലിക്കുക മാത്രമാണ് അധികൃതർ ചെയ്യുന്നതെന്നും അദ്ദേഹം പറഞ്ഞു. “വാർ ഉപയോഗിച്ച് ഒരാളെ സഹായിക്കുക എന്നത് അസാധ്യമാണ്. ലോകകപ്പിന് മുൻപ് തന്നെ ഇതിന്റെ നിയമങ്ങൾ കൃത്യമായി ഞങ്ങൾക്ക് വ്യക്തമാക്കിയിട്ടുണ്ട്. ആ നിയമങ്ങൾ അക്ഷരംപ്രതി നടപ്പിലാക്കുക മാത്രമാണ് അവിടെ നടക്കുന്നത്,” സ്കലോണി പറഞ്ഞു.
Summary: Argentina manager Lionel Scaloni has dismissed allegations that the 2026 FIFA World Cup is “fixed” to favor the defending champions. Addressing claims regarding favorable refereeing and fixture paths, Scaloni stated that such criticism motivates his players to perform better and reaffirmed that VAR decisions are being implemented according to pre-tournament rules.
