ടോറസ് ലോറി ബൈക്കിലിടിച്ച് പിതാവും മകളും മരിച്ചു
Apr 3, 2024, 13:06 IST
കൊച്ചി: ബൈക്കിൽ ടോറസ് ലോറിയിടിച്ച് എറണാകുളം പെരുമ്പാവൂര്‍ താന്നിപ്പുഴയില്‍ പിതാവും മകളും മരണപ്പെട്ടു. മരിച്ചത് കറുകടം സ്വദേശികളായ കെ.ഐ. എൽദോ (52), മകള്‍ ബ്ലെസി എന്നിവരാണ്. അപകടം നടന്നത് പെരുമ്പാവൂർ - കാലടി റൂട്ടിൽ താന്നിപ്പുഴ പള്ളിപ്പടിക്കു സമീപം രാവിലെ 7.45നാണ്. മകളെ അങ്കമാലി റെയിൽവേ സ്റ്റേഷനിലാക്കാൻ പോവുകയായിരുന്ന അവസരത്തിൽ ടിപ്പർ ലോറി ഇവര്‍ സഞ്ചരിച്ചിരുന്ന ബൈക്കിന് പിന്നില്‍ ഇടിക്കുകയും തെറിച്ചുവീണ ഇരുവരുടേയും ശരീരത്തിലൂടെ ടിപ്പര്‍ കയറിയിറങ്ങുകയും ചെയ്തു. ബൈക്കിലിടിച്ച ശേഷം ടിപ്പർ നിന്നത് 10 മീറ്ററോളം മുന്നിലേക്ക് നിരങ്ങി നീങ്ങിയ ശേഷമാണ്. സംഭവസ്ഥലത്ത് വച്ച് തന്നെ ബ്ലെസി മരിച്ചു. പിതാവായ എൽദോ മരിച്ചത് ആശുപത്രിയിലേക്കുള്ള വഴിമധ്യേയാണ്. പെരുമ്പാവൂർ താലൂക്ക് ആശുപത്രി മോർച്ചറിയിൽ ബ്ലെസിയുടെ മൃതദേഹവും അങ്കമാലി ലിറ്റിൽ ഫ്ലവർ ആശുപത്രി മോർച്ചറിയിൽ എൽദോയുടെ മൃതദേഹവും സൂക്ഷിച്ചിരിക്കുകയാണ്. പോലീസ് ടിപ്പര്‍ ഡ്രൈവറെ കസ്റ്റഡിയിലെടുത്തു.