തിരുവനന്തപുരം: പ്രതികരണശേഷിയുള്ള ജനതയ്ക്ക് മാത്രമേ ശക്തമായ ഒരു ഭരണകൂടത്തെ സൃഷ്ടിക്കാൻ സാധിക്കൂ എന്ന് നടൻ നിവിൻ പോളി. അഴിമതിക്കെതിരായ പോരാട്ടം സ്കൂളുകളിലും കോളേജുകളിലും നിന്ന് തന്നെ ആരംഭിക്കണമെന്നും അദ്ദേഹം അഭിപ്രായപ്പെട്ടു. സംസ്ഥാന വിജിലൻസ് ആൻഡ് ആന്റി കറപ്ഷൻ ബ്യൂറോ സംഘടിപ്പിച്ച ‘പ്രോജക്ട് സീറോ – വിജിലൻസ് കമാൻഡോ’ യുവജന ക്യാമ്പയിന്റെ സംസ്ഥാനതല ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം.(Nivin Pauly Appointed First Vigilance Commando At Launch Of Project Zero Anti Corruption Campaign)
ചടങ്ങിൽ വെച്ച് മന്ത്രി രമേശ് ചെന്നിത്തല നിവിൻ പോളിക്ക് വിജിലൻസ് കമാൻഡോ ബാഡ്ജ് അണിയിക്കുകയും അദ്ദേഹത്തെ സംസ്ഥാനത്തെ ആദ്യ വിജിലൻസ് കമാൻഡോയായി പ്രഖ്യാപിക്കുകയും ചെയ്തു. അഴിമതിരഹിതമായ ഒരു സമൂഹം കെട്ടിപ്പടുക്കുന്നതിൽ സർക്കാരിന്റെ വലിയൊരു മുന്നേറ്റമാണ് ‘പ്രോജക്ട് സീറോ’ എന്നും യുവതലമുറയ്ക്ക് വലിയ പ്രതീക്ഷ നൽകുന്ന ഈ പദ്ധതിയുടെ ഭാഗമാകാൻ കഴിഞ്ഞതിൽ ഏറെ അഭിമാനമുണ്ടെന്നും നിവിൻ വ്യക്തമാക്കി.
തന്റെ ‘ആക്ഷൻ ഹീറോ ബിജു’ എന്ന ചിത്രത്തെ സ്മരിച്ച അദ്ദേഹം, നിയമത്തിലുള്ള ജനങ്ങളുടെ വിശ്വാസമാണ് സമൂഹത്തിന്റെ അടിത്തറയെന്ന് അഭിപ്രായപ്പെട്ടു. കൈക്കൂലി വാങ്ങുന്നതും കൊടുക്കുന്നതും മാത്രമല്ല അഴിമതി; മറ്റൊരാളുടെ അർഹതപ്പെട്ട അവസരം തട്ടിയെടുക്കുന്നതും അഴിമതി തന്നെയാണ്. നേരായ വഴിയിലൂടെ പോയാൽ ജയിക്കാൻ കഴിയില്ലെന്ന തെറ്റായ ചിന്താഗതി മാറ്റിയെടുക്കാൻ ഇത്തരം കാമ്പയിനുകൾക്ക് കഴിയും, നിവിൻ പറഞ്ഞു. ചോദ്യങ്ങൾ ചോദിക്കുന്ന ഇന്നത്തെ തലമുറയുടെ രീതി അഴിമതി തടയാനും ഭരണസംവിധാനങ്ങളെ കൂടുതൽ ഉത്തരവാദിത്തമുള്ളവരാക്കാനും സഹായിക്കുമെന്നും, തെറ്റുകൾക്കെതിരെ യുവാക്കൾ ധൈര്യത്തോടെ പ്രതികരിക്കണമെന്നും അദ്ദേഹം കൂട്ടിച്ചേർത്തു.
Story Summary
Actor Nivin Pauly was declared Kerala’s first Vigilance Commando by Minister Ramesh Chennithala during the launch of the Vigilance and Anti-Corruption Bureau’s ‘Project Zero’ campaign. Speaking at the event, Nivin emphasized that the fight against corruption must begin in schools and colleges and encouraged youth to fearlessly question wrongdoings.
