ചെന്നൈ: തെന്നിന്ത്യൻ സിനിമാ ലോകം ഏറെ ആകാംക്ഷയോടെ കാത്തിരിക്കുന്ന തമിഴ്നാട് മുഖ്യമന്ത്രി വിജയുടെ മകൻ ജേസൺ സഞ്ജയ്യുടെ കന്നി സംവിധാന സംരംഭമായ ‘സിഗ്മ’ ജൂലൈ 31-ന് ലോകമെമ്പാടും റിലീസ് ചെയ്യും (Jason Sanjay Sigma Movie Release). പ്രശസ്ത നിർമ്മാണ കമ്പനിയായ ലൈക്ക പ്രൊഡക്ഷൻസാണ് വെള്ളിയാഴ്ച തങ്ങളുടെ ഔദ്യോഗിക പേജിലൂടെ ചിത്രത്തിന്റെ റിലീസ് തീയതി പുറത്തുവിട്ടത്. യുവനടൻ സന്ദീപ് കിഷൻ കേന്ദ്രകഥാപാത്രത്തെ അവതരിപ്പിക്കുന്ന ഈ ചിത്രം 2023 ഓഗസ്റ്റിലാണ് പ്രഖ്യാപിക്കപ്പെട്ടത്. കഴിഞ്ഞ വർഷം പുറത്തിറങ്ങിയ ചിത്രത്തിന്റെ മോഷൻ പോസ്റ്റർ നൽകിയ സൂചനകൾ പ്രകാരം ഇതൊരു ഹൈ-വോൾട്ടേജ് ആക്ഷൻ ക്രൈം ത്രില്ലറായിരിക്കുമെന്നാണ് വിലയിരുത്തപ്പെടുന്നത്. നിധി വേട്ടയും കുറ്റകൃത്യങ്ങളും പശ്ചാത്തലമാകുന്ന ചിത്രത്തിൽ മികച്ച ആക്ഷൻ രംഗങ്ങളും കോമഡിയും ഡ്രാമയും സമന്വയിപ്പിച്ചിട്ടുണ്ടെന്ന് അണിയറപ്രവർത്തകർ അവകാശപ്പെടുന്നു.
ആദ്യ ചിത്രത്തിന്റെ റിലീസ് തീയതി പ്രഖ്യാപിച്ചതിൽ താൻ ഏറെ ആവേശഭരിതനാണെന്നും തന്റെ കാഴ്ചപ്പാടിൽ വിശ്വസിച്ച് പൂർണ്ണ പിന്തുണ നൽകിയ ലൈക്ക പ്രൊഡക്ഷൻസ് മേധാവി സുബാസ്കരനോടും സമർപ്പണബോധമുള്ള മറ്റ് അണിയറപ്രവർത്തകരോടും നന്ദി പറയുന്നതായും ജേസൺ സഞ്ജയ് ഔദ്യോഗിക പ്രസ്താവനയിലൂടെ അറിയിച്ചു. തികച്ചും പ്രൊഫഷണലായ വ്യക്തതയോടെയും കഠിനാധ്വാനത്തോടെയുമാണ് സഞ്ജയ് ഈ ചിത്രം പൂർത്തിയാക്കിയതെന്ന് ലൈക്ക പ്രൊഡക്ഷൻസിന്റെ പ്രതിനിധി ജി.കെ.എം തമിഴ് കുമാരൻ പ്രശംസിച്ചു. നാല് മാസങ്ങളിലായി വെറും 65 ദിവസങ്ങൾ കൊണ്ടാണ് ചിത്രത്തിന്റെ ഷൂട്ടിംഗ് പൂർത്തിയാക്കിയത്. ഫരിയ അബ്ദുള്ള, രാജു സുന്ദരം, സമ്പത്ത് രാജ്, ശിവ് പണ്ഡിറ്റ് തുടങ്ങിയ വലിയ താരനിര അണിനിരക്കുന്ന ചിത്രത്തിന് സംഗീതം പകരുന്നത് തമൻ എസ് ആണ്. പ്രശസ്ത ഒ.ടി.ടി പ്ലാറ്റ്ഫോമായ നെറ്റ്ഫ്ലിക്സ് ചിത്രത്തിന്റെ ഡിജിറ്റൽ സ്ട്രീമിംഗ് അവകാശങ്ങൾ ഇതിനകം തന്നെ വൻ തുകയ്ക്ക് സ്വന്തമാക്കിയിട്ടുണ്ട്.
Summary: Jason Sanjay, son of Thalapathy Vijay, is set to make his directorial debut with the film ‘Sigma’, which will release worldwide on July 31. Produced by Lyca Productions and starring Sundeep Kishen, the action-crime thriller was completed in 65 days over a four-month shooting schedule. Featuring music by Thaman S, the production house also confirmed that Netflix has officially acquired the digital streaming rights for the movie.
