അശ്വത്ഥാമാവായി അമിതാഭ് ബച്ചന്‍; 'കല്‍ക്കി 2898 എ.ഡി'യുടെ പുതിയ പോസ്റ്റര്‍
വൈജയന്തി മൂവീസിന്റെ ബാനറില്‍ പ്രഭാസ് - നാഗ് അശ്വിന്‍ കൂട്ടുകെട്ടില്‍ നിർമ്മിക്കുന്ന 'കല്‍ക്കി 2898 എ.ഡി'യില്‍ അമിതാഭ് ബച്ചന്‍ അവതരിപ്പിക്കുന്ന കഥാപാത്രത്തിന്റെ പോസ്റ്റര്‍ പുറത്തുവിട്ട് അണിയറപ്രവർത്തകർ. അശ്വത്ഥാമാവ് എന്ന ബച്ചന്റെ കഥാപാത്രത്തിന്റെ പോസ്റ്ററിനൊപ്പം 'അവന്റെ കാത്തിരിപ്പ് അവസാനിക്കുന്നു' എന്ന കുറിപ്പും ഒപ്പമുണ്ട്.
ജൂണ്‍ 10-ന് 'കല്‍ക്കി 2898 എ.ഡി'യുടെ ട്രെയ്‌ലര്‍ പുറത്തിറങ്ങും. കല്‍ക്കി 2898 എ.ഡിയുടെ റിലീസിന് മുന്നോടിയായി പുറത്തിറങ്ങിയ ബുജ്ജി ആന്‍ഡ് ഭൈരവ എന്ന ആമസോണ്‍ പ്രൈം വീഡിയോ ആനിമേഷന്‍ സീരീസ് ഏറെ ശ്രദ്ധിക്കപ്പെട്ടിരുന്നു. ചിത്രം ജൂണ്‍ 27-നാണ് തീയറ്ററുകളിലെത്തുക.
ബി.സി. 3101-ലെ മഹാഭാരതത്തിലെ ഇതിഹാസ സംഭവങ്ങളില്‍നിന്ന് ആരംഭിച്ച് 2898 എ.ഡി വരെ സംഭവിക്കുന്ന സഹസ്രാബ്ദങ്ങള്‍ നീണ്ടുനില്‍ക്കുന്ന ഒരു നീണ്ട യാത്രയാണ് ഇതിവൃത്തം. 'മഹാനടി'ക്ക് ശേഷം നാഗ് അശ്വിന്റെ സംവിധാനത്തിൽ ഒരുങ്ങുന്ന ചിത്രം പോസ്റ്റ് അപോകാലിപ്റ്റിക് യുഗത്തിന്റെ കഥയാണ് പറയുന്നത്.