കേരളത്തിന്റെ പൊതുവിദ്യാസരംഗം ഉയർന്ന ഗുണനിലവാരം പുലർത്തുന്നു: മന്ത്രി വി ശിവൻകുട്ടി

വിദ്യാഭ്യാസത്തിന് ജനങ്ങൾ നൽകുന്ന പ്രാധാന്യവും, യോഗ്യതയും മികവുമുള്ള അധ്യാപക സമൂഹവും കേരളത്തിന്റെ പൊതുവിദ്യാഭ്യാസ രംഗത്തെ ഉന്നത ഗുണനിലവാരമുള്ളതാക്കി മാറ്റുന്നതായി പൊതു വിദ്യാഭ്യാസ വകുപ്പ് മന്ത്രി വി ശിവൻകുട്ടി പറഞ്ഞു. പട്ടം ഗവ മോഡൽ ഗേൾസ് എച്ച് എസ് എസിൽ നടന്ന സംസ്ഥാന തല അധ്യാപക സംഗമം 2024 ഉദ്ഘാടനം ചെയ്യുകയായിരുന്നു മന്ത്രി. സർക്കാർ നടത്തുന്ന നിക്ഷേപങ്ങളും നിരന്തര വിലയിരുത്തലും പൊതുവിദ്യാദ്യാസത്തിന് കരുത്ത് പകരുന്നു. മാറുന്ന കാലത്തിനനുസരിച്ചുള്ള മാറ്റങ്ങളെ ഉൾക്കൊണ്ട് പാഠ്യപദ്ധതി ചടക്കൂട് സൃഷ്ടിച്ച് ജ്ഞാന സമൂഹത്തെ സൃഷ്ടിക്കുകയാണ് സർക്കാർ ചെയ്യുന്നത്. ജനകീയ, ജനാധിപത്യ മതേതര മൂല്യങ്ങളെ ഉയർത്തിപ്പിടിക്കുന്ന വിദ്യാഭ്യാസ നയമാണ് സംസ്ഥാന സർക്കാർ പിൻതുടരുന്നത്. പരിസ്ഥിതി,ശാസ്ത്ര ബോധവും ലിംഗ നീതിയും സാംസ്‌കാരിക വൈവിധ്യങ്ങളും ഉൾപ്പെടുത്തിയുള്ള പാഠ്യപദ്ധതിയാണ് പിൻതുടരുന്നതെന്നും മന്ത്രി പറഞ്ഞു.