ഡി സി സിയിൽ നാടകീയ രംഗങ്ങൾ: വിവാദങ്ങൾക്കിടെ രാജി പ്രഖ്യാപിച്ച് ജോസ് വള്ളൂരും എം പി വിൻസെൻറും
Jun 10, 2024, 13:15 IST
തൃശൂർ: ജോസ് വള്ളൂർ ലോക്സഭാ തെരഞ്ഞെടുപ്പിൽ കെ മുരളീധരൻ്റെ തോൽവിയുമായി ബന്ധപ്പെട്ടുണ്ടായ വിവാദങ്ങളെ തുടർന്ന് ഡി സിസി അധ്യക്ഷ സ്ഥാനം രാജി വെച്ചതായി അറിയിച്ചു. ഒരു വിഭാഗം പ്രവർത്തകർ ഡൽഹിയിൽ നിന്ന് തിരിച്ചെത്തി ഡി സി സി ഓഫീസിലേക്ക് വന്ന ജോസ് വള്ളൂരിന് സ്വീകരണമൊരുക്കിയിട്ടുണ്ടായിരുന്നു. ഓഫീസിൽ വീണ്ടും സംഘർഷാവസ്ഥ സൃഷ്ടിച്ചത് ഇതായിരുന്നു. തുടർന്നാണ് ജോസ് വളളൂർ ഡി സി സിയിലെ ഭാരവാഹിയോഗത്തിൽ രാജിവെച്ചതായി അറിയിച്ചത്. എം പി വിൻസെൻറും യു ഡി എഫ് ചെയർമാൻ സ്ഥാനത്ത് നിന്ന് രാജിവെച്ചതായി അറിയിക്കുകയുണ്ടായി. നാടകീയ രംഗങ്ങളാണ് ഡി സി സി ഓഫീസിൽ അരങ്ങേറുന്നത്. പ്രവർത്തകർ ജോസ് വളളൂരിനനുകൂലമായി മുദ്രാവാക്യം മുഴക്കി രംഗത്തെത്തുകയുണ്ടായി. വീണ്ടും തൃശൂരിലെ കോൺഗ്രസ് തോൽ‌വിയിൽ പോസ്റ്റർ പ്രത്യക്ഷപ്പെടുകയുണ്ടായി. ഡി സി സി ഓഫീസിന് മുൻപിൽ പോസ്റ്ററുകള്‍ പതിച്ചിരിക്കുന്നത് പ്രസിഡൻറ് ജോസ് വള്ളൂരിന് ഐക്യദാർഢ്യമറിയിച്ചാണ്. പോസ്റ്ററിൽ പറയുന്നത് തെരഞ്ഞെടുപ്പ് പരാജയത്തിൻ്റെ യഥാർത്ഥ പ്രതികളെ സംരക്ഷിച്ച് ജോസ് വള്ളൂരിനെ ബലി കൊടുക്കരുതെന്നാണ്. 'സേവ് കോൺഗ്രസ്' എന്ന പേരിൽ പോസ്റ്ററുകൾ ചേലക്കരയിൽ രമ്യ ഹരിദാസിനെതിരെയും പ്രത്യക്ഷപ്പെടുകയുണ്ടായി. ഇത് ആലത്തൂരിൽ പരാജയപ്പെട്ട രമ്യാ ഹരിദാസിനെ ചേലക്കരയിലെ സ്ഥാനാർത്ഥിയായി പരിഗണിക്കുന്നതിനെതിരെയാണ്.