തിരുവനന്തപുരം: കഞ്ചാവ് വാങ്ങാൻ പണം നൽകാത്തതിനെത്തുടർന്ന് യുവാവ് ബന്ധുവിന്റെ വീടിന് തീയിട്ടു. തിരുവനന്തപുരം കണിയാപുരത്ത് ഷാജഹാൻ-അമീന ദമ്പതികളുടെ വീടാണ് കത്തിനശിച്ചത്. സംഭവത്തിൽ അമീനയുടെ സഹോദരീപുത്രനായ ഫൈസലിനെ പോലീസ് കസ്റ്റഡിയിലെടുത്തു. (Youth sets house on fire in Thiruvananthapuram after not giving money for cannabis)
വീടിന് തീയിടുമെന്ന ഭീഷണി നിലനിന്നിരുന്നതിനാൽ വീട്ടുകാർ നേരത്തെ മാറിതാമസിച്ചതുകൊണ്ട് വലിയൊരു ദുരന്തം ഒഴിവായി. ബുധനാഴ്ച വൈകിട്ടോടെയാണ് ഫൈസൽ അമീനയുടെ വീട്ടിലെത്തി ലഹരിമരുന്ന് വാങ്ങാനായി പണം ആവശ്യപ്പെട്ടത്.
വീട്ടുകാർ പണം നൽകാൻ വിസമ്മതിച്ചതോടെ ഫൈസൽ ബഹളം വെക്കുകയും വീടിന് തീയിടുമെന്ന് ഭീഷണിപ്പെടുത്തുകയും ചെയ്തു. തുടർന്ന് സ്വന്തം കൈഞരമ്പ് മുറിച്ച ഫൈസലിനെ മംഗലപുരം പോലീസ് എത്തിയാണ് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചത്. ആശുപത്രിയിൽ ചികിത്സയിലിരിക്കെ പുലർച്ചെയോടെ അവിടെനിന്ന് ഇറങ്ങിയ ഫൈസൽ നേരെ കണിയാപുരത്തെ വീട്ടിലെത്തി തീയിടുകയായിരുന്നു.
