പ്രണയാഭ്യർത്ഥന നിരസിച്ചതിനെ പ്രതികാരം; കർണാടകയിൽ 20കാരിയെ കുത്തിക്കൊന്നു
May 15, 2024, 12:59 IST
![crime](https://timeskerala.com/static/c1e/client/91214/uploaded/7b8ca48931fcbaa6cce780bbf4709802.jpg)
ബംഗളുരു: കർണാടക ഹുബ്ബള്ളിയിൽ 20കാരിയെ കുത്തി കൊലപ്പെടുത്തി. പ്രണയാഭ്യർത്ഥന നിരസിച്ചതിന്റെ വൈരാഗ്യത്തിലാണ് ക്രൂര കൊലപാതകമെന്നാണ് റിപ്പോർട്ട്. സംഭവത്തിൽ പ്രതി ഗിരീഷ് സാവന്തിനെ പൊലീസ് പിടികൂടി. അഞ്ജലിയെന്ന വിദ്യാർഥിയാണ് ദാരുണമായി കൊല്ലപ്പെട്ടത്. വീട്ടിൽ അതിക്രമിച്ച് കയറിയാണ് പ്രതി പെൺകുട്ടിയെ കൊലപ്പെടുത്തിയത്. കഴിഞ്ഞദിവസം പ്രതി വിദ്യാർഥിനിയോട് പ്രണയാഭ്യർത്ഥന നടത്തിയിരുന്നു. എന്നാൽ വിദ്യാർഥിനി ഇത് നിരസിച്ചു. ഇതിന് ശേഷം വിദ്യർഥിനിയെ പ്രതി ശല്യപ്പെടുത്തിയിരുന്നുവെന്ന് പൊലീസ് പറയുന്നു. വിദ്യാർഥിനിയുടെ ബന്ധുക്കൾ വിഷയത്തിൽ ഇടപെടുകയും ശല്യം ചെയ്താൽ പൊലീസിൽ പരാതി നൽകുമെന്ന് മുന്നറിയിപ്പും നൽകിയിരുന്നു.ഇതിന് പിന്നാലെയാണ് ഇന്ന് പുലർച്ചെ വീട്ടിൽ അതിക്രമിച്ചെത്തിയ പ്രതി ക്രൂര കൊലപാതകം നടത്തിയത്. വീട്ടിൽ അതിക്രമിച്ച് കയറിയ പ്രതി ഉറങ്ങിക്കിടക്കുകയായിരുന്ന വിദ്യാർഥിനിയെ കുത്തിക്കൊലപ്പെടുത്തുകയായിരുന്നു. തടയാൻ ശ്രമിച്ച ബന്ധുക്കളെയും പ്രതി ആക്രമിച്ചു. കൃത്യത്തിന് ശേഷം സംഭവ സ്ഥലത്ത് നിന്ന് ഓടി രക്ഷപ്പെട്ട പ്രതിയെ പൊലീസ് പിടികൂടി.