ദാവൻഗെരെ: കർണാടകയിലെ ദാവൻഗെരെയിൽ പ്രണയിച്ച് വിവാഹം കഴിച്ച യുവദമ്പതികൾക്ക് നേരെ പോലീസ് സ്റ്റേഷൻ വളപ്പിൽ വെച്ച് ക്രൂരമായ ആക്രമണം. ദാവൻഗെരെ ജില്ലയിലെ ചന്നഗിരി താലൂക്കിലുള്ള ബസവപട്ടണ പോലീസ് സ്റ്റേഷൻ പരിസരത്ത് തിങ്കളാഴ്ചയാണ് സംഭവം. പെൺകുട്ടിയുടെ ബന്ധുക്കൾ നടത്തിയ അക്രമത്തിൽ യുവാവിന് ഗുരുതരമായി പരിക്കേറ്റു.(Newly Married Couple Attacked Inside Police Station In Davanagere Honor Killing Attempt)
ചന്നഗിരി ദാഗിനകട്ടെ ഗ്രാമത്തിലെ ലീലാവതി (18), കാഞ്ചുഗരനഹള്ളി സ്വദേശി സിദ്ധേഷ് (22) എന്നിവരാണ് ആക്രമിക്കപ്പെട്ടത്. പ്രണയത്തിലായിരുന്ന ഇരുവരും വീട്ടുകാരുടെ എതിർപ്പ് മറികടന്ന് അടുത്തിടെയാണ് വിവാഹിതരായത്. പെൺകുട്ടിയുടെ കുടുംബാംഗങ്ങളിൽ നിന്ന് വധഭീഷണിയുണ്ടെന്ന് കാട്ടി ദമ്പതികൾ നേരത്തെ ദാവൻഗെരെ എസ്പിയെ സമീപിച്ചിരുന്നു. സുരക്ഷ ഉറപ്പാക്കുന്നതിനായി ഇവരോട് ബസവപട്ടണ പോലീസ് സ്റ്റേഷനിലേക്ക് ചെല്ലാൻ എസ്പി നിർദേശിക്കുകയായിരുന്നു.
എന്നാൽ പോലീസ് സ്റ്റേഷനിൽ എത്തിയതിന് തൊട്ടുപിന്നാലെ, അവിടെ കാത്തുനിന്ന പെൺകുട്ടിയുടെ ബന്ധുക്കൾ കത്തിയും മാരകായുധങ്ങളുമായി ദമ്പതികളെ ആക്രമിക്കുകയായിരുന്നു. ആക്രമണത്തിൽ സിദ്ധേഷിന്റെ കൈയ്ക്ക് ആഴത്തിൽ വെട്ടേറ്റു. യുവാവിനെ ദാവൻഗെരെയിലെ ആശുപത്രിയിൽ അടിയന്തിര ശസ്ത്രക്രിയയ്ക്ക് വിധേയനാക്കി. പെൺകുട്ടിയുടെ ബന്ധുക്കളും ഒപ്പമുണ്ടായിരുന്ന ചിലരുമാണ് അക്രമത്തിന് പിന്നിലെന്ന് പോലീസ് സ്ഥിരീകരിച്ചു. സംഭവത്തിൽ ബസവപട്ടണ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
Story Summary
A newly married couple was brutally attacked with a knife by the bride’s relatives inside the Basavapattana police station premises in Davanagere. The couple had approached the police seeking protection following death threats from the girl’s family. The groom sustained severe injuries to his hand and is currently undergoing surgery at a local hospital.
