തിരുവനന്തപുരം: പതിനഞ്ചു വയസ്സുകാരിയെ മാസങ്ങളോളം ലൈംഗിക പീഡനത്തിനിരയാക്കിയ സംഭവത്തിൽ അമ്മയുടെ സുഹൃത്ത് അറസ്റ്റിലായി. കിളിമാനൂർ കാരേറ്റ് സ്വദേശി ബിജുവിനെയാണ് പോലീസ് പിടികൂടിയത്. പീഡനത്തിന് കൂട്ടുനിന്ന പെൺകുട്ടിയുടെ അമ്മയെ രണ്ടാം പ്രതിയാക്കി കേസെടുത്തു. ഇവർ നിലവിൽ ഒളിവിലാണ്.(Mother’s friend who raped 15-year-old girl arrested, Search underway for mother)
2025 ഡിസംബർ മുതൽ 2026 മാർച്ച് വരെയുള്ള കാലയളവിൽ പ്രതി ബിജു പെൺകുട്ടിയെ പലതവണ ക്രൂരമായി പീഡിപ്പിച്ചെന്നാണ് പരാതി. ഭർത്താവുമായി അകന്നു കഴിയുന്ന അമ്മയും രണ്ട് പെൺമക്കളും വാടകവീട്ടിലായിരുന്നു താമസം. അമ്മയുമായുള്ള പരിചയം മുതലെടുത്ത് വീട്ടിലെത്തിയിരുന്ന ബിജു, അമ്മയുടെ സാന്നിധ്യത്തിൽ തന്നെയാണ് പെൺകുട്ടിയെ ഉപദ്രവിച്ചിരുന്നത്. വീട്ടിൽ വെച്ച് മാത്രമല്ല, വർക്കല ബീച്ചിൽ കൊണ്ടുപോയും ഇയാൾ കുട്ടിയെ പീഡിപ്പിച്ചതായി മൊഴിയുണ്ട്.
തുടർച്ചയായ പീഡനം സഹിക്കവയ്യാതെ പെൺകുട്ടി അമ്മയുമായി വഴക്കിടുകയും പിണങ്ങി അച്ഛന്റെ വീട്ടിലേക്ക് മാറുകയും ചെയ്തു. പിന്നീട് അമ്മയുടെ അടുത്തേക്ക് പോകാൻ കുട്ടി വിസമ്മതിച്ചതോടെ നടത്തിയ കൗൺസിലിങ്ങിലാണ് ഞെട്ടിക്കുന്ന വിവരങ്ങൾ പുറത്തുവന്നത്. പെൺകുട്ടിയുടെ മൊഴി രേഖപ്പെടുത്തിയ ഉടൻ തന്നെ പോലീസ് ബിജുവിനെ കസ്റ്റഡിയിലെടുത്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
