പത്തനംതിട്ട: സംസ്ഥാനത്ത് മഴക്കെടുതി രൂക്ഷമായി തുടരുന്നതിനിടെ ഭരണ-പ്രതിപക്ഷ രാഷ്ട്രീയ പോര് കനക്കുന്നു. മുഖ്യമന്ത്രി വി.ഡി. സതീശന്റെ 2018-ലെ പ്രളയകാലത്തെ പഴയ വീഡിയോ ഫേസ്ബുക്കിൽ പങ്കുവെച്ചുകൊണ്ട് കോന്നി എം.എൽ.എ കെ.യു. ജനീഷ് കുമാർ രംഗത്തെത്തി. ദുരന്തമുഖത്ത് ചോദ്യാവലിയുമായി എത്തിയയാളോട് സതീശൻ തട്ടിക്കയറുന്ന ദൃശ്യങ്ങളാണ് വീഡിയോയിലുള്ളത്.(KU Jenish Kumar Releases 2018 Video Of CM VD Satheesan)
നാട് വലിയ ദുരിതത്തിലൂടെ കടന്നുപോകുമ്പോൾ രാഷ്ട്രീയ വിവാദങ്ങൾ ഒഴിവാക്കാൻ പരമാവധി ശ്രമിച്ചതാണെന്നും എന്നാൽ ദുരിതത്തിനിടയിലും ഉത്തരവാദിത്തമില്ലാത്ത സമീപനങ്ങളും രാഷ്ട്രീയ നാടകങ്ങളും ആവർത്തിക്കുമ്പോൾ പ്രതികരിക്കാതിരിക്കാനാവില്ലെന്നും ജനീഷ് കുമാർ ഫേസ്ബുക്ക് കുറിപ്പിൽ വ്യക്തമാക്കി. മുൻകാലങ്ങളിൽ 75,000-ത്തോളം പേരെ ക്യാമ്പുകളിലാക്കി താൻ പ്രളയരക്ഷാ പ്രവർത്തനം നടത്തിയിട്ടുണ്ടെന്നുള്ള വി.ഡി. സതീശന്റെ വാർത്താസമ്മേളന അവകാശവാദങ്ങൾക്ക് മറുപടിയായാണ് ജനീഷ് കുമാർ ഈ വീഡിയോ പുറത്തുവിട്ടത്.
അതേസമയം, എൽ.ഡി.എഫ് നേതാക്കളുടെ കടുത്ത വിമർശനങ്ങൾക്കിടെ മുഖ്യമന്ത്രി വി.ഡി. സതീശൻ ഇന്ന് പത്തനംതിട്ടയിലെ പ്രളയബാധിത പ്രദേശങ്ങൾ സന്ദർശിക്കും. ഉച്ചയ്ക്ക് 12 മണിയോടെ ആറൻമുളയിലും തുടർന്ന് റാന്നിയിലും എത്തുന്ന അദ്ദേഹം ദുരിതാശ്വാസ ക്യാമ്പുകളുടെ പ്രവർത്തനവും രക്ഷാപ്രവർത്തന ഏകോപനവും നേരിട്ട് വിലയിരുത്തും.
Story Summary
MLA K.U. Jenish Kumar released a 2018 flood video of CM V.D. Satheesan amidst intense political sparring over rain relief operations. Satheesan is set to visit flood-hit areas in Pathanamthitta including Ranni and Aranmula today.
