നദിയാദ്: ചരക്ക് വാഹനം വിട്ടുനൽകുന്നതിനായി 55 ലക്ഷം രൂപ കൈക്കൂലി ആവശ്യപ്പെട്ട രണ്ട് സെൻട്രൽ ജിഎസ്ടി ഉദ്യോഗസ്ഥരെ ഗുജറാത്ത് അഴിമതി വിരുദ്ധ ബ്യൂറോ അറസ്റ്റ് ചെയ്തു. കൈക്കൂലിയുടെ ആദ്യ ഗഡുവായ 10 ലക്ഷം രൂപ സ്വന്തം ഓഫീസിനുള്ളിൽ വെച്ച് സ്വീകരിക്കുന്നതിനിടെയാണ് ഇവർ പിടിയിലായത്.(2 GST Officials Arrested Over Rs 55-Lakh Bribe Demand In Gujarat)
നദിയാദിലെ സെൻട്രൽ ജിഎസ്ടി ഭവനിലെ സൂപ്രണ്ട് (ക്ലാസ്-2) അമർനാഥ് ഗോവർധൻറാം സരോജ്, ജിഎസ്ടി ഇൻസ്പെക്ടർ (ക്ലാസ്-2) സുബോധ് സുഭാഷ് ചൗഹാൻ എന്നിവരാണ് പിടിയിലായ പ്രതികൾ. പരാതിക്കാരന്റെ ഉടമസ്ഥതയിലുള്ള ചരക്ക് ലോറി സെൻട്രൽ ജിഎസ്ടി വിഭാഗം തടഞ്ഞുവെച്ച് പരിശോധനയ്ക്കായി നദിയാദ് ഓഫീസിലേക്ക് മാറ്റിയിരുന്നു. വാഹനം വിട്ടുനൽകാൻ സമീപിച്ച ഉടമയോട്, രേഖകളിൽ പോരായ്മകളുണ്ടെന്ന് ഇൻസ്പെക്ടർ സുബോധ് ചൗഹാനും സൂപ്രണ്ട് അമർനാഥ് സരോജും ആരോപിച്ചു.
തുടർന്ന് നിയമനടപടികൾ ഒഴിവാക്കി വാഹനം വിട്ടുനൽകുന്നതിനായി ഇവർ 55 ലക്ഷം രൂപ കൈക്കൂലി ആവശ്യപ്പെടുകയായിരുന്നു. ഇതിൽ 10 ലക്ഷം രൂപ ഉടനടി നൽകണമെന്നും ഇവർ നിർബന്ധിച്ചു. കൈക്കൂലി നൽകാൻ തയ്യാറാകാത്ത ട്രാൻസ്പോർട്ട് ഉടമ എസിബി ടോൾ ഫ്രീ നമ്പറായ 1064-ൽ ബന്ധപ്പെട്ട് പരാതി നൽകി. ഇതിന്റെ അടിസ്ഥാനത്തിൽ ഗാന്ധിനഗർ എസിബി യൂണിറ്റ് തന്ത്രപരമായ കെണിയൊരുക്കി.
നദിയാദിലെ സെൻട്രൽ ജിഎസ്ടി ഓഫീസിൽ വെച്ചാണ് പണം കൈമാറാൻ നിശ്ചയിച്ചിരുന്നത്. പണം ആവശ്യപ്പെട്ടുകൊണ്ടുള്ള ഉദ്യോഗസ്ഥരുടെ സംഭാഷണങ്ങൾ എസിബി സംഘം റെക്കോർഡ് ചെയ്തു. 10 ലക്ഷം രൂപ കൈപ്പറ്റിയ ഉടൻ തന്നെ പിഐ ഡി.എ. ചൗധരിയുടെ നേതൃത്വത്തിലുള്ള സംഘം ഓഫീസിലെത്തി രണ്ട് ഉദ്യോഗസ്ഥരെയും കയ്യോടെ പിടികൂടി. അഴിമതി നിരോധന നിയമപ്രകാരം കേസെടുത്ത എസിബി ഉദ്യോഗസ്ഥർ, പിടിച്ചെടുത്ത 10 ലക്ഷം രൂപയും ഓഫീസിൽ നിന്ന് കണ്ടെടുത്തു. ഈ ഉദ്യോഗസ്ഥർ കേന്ദ്രീകരിച്ച് മറ്റ് ട്രാൻസ്പോർട്ടർമാരെ ഭീഷണിപ്പെടുത്തി പണം തട്ടുന്ന സംഘങ്ങൾ പ്രവർത്തിക്കുന്നുണ്ടോ എന്ന് എസിബി അന്വേഷിച്ചുവരികയാണ്.
