അറ്റ്ലാന്റ: ഫിഫ ലോകകപ്പ് 2026 സെമിഫൈനലിൽ ഇംഗ്ലണ്ടിനെ ആദ്യമായി നേരിടാനൊരുങ്ങുന്നതിന്റെ ആവേശം പങ്കുവെച്ച് അർജന്റീന നായകൻ ലയണൽ മെസി. ഇരുപത് വർഷത്തിലേറെ നീണ്ട അന്താരാഷ്ട്ര കരിയറിനിടെ ലോക ഫുട്ബോളിലെ എല്ലാ പ്രധാന ശക്തികളെയും നേരിട്ടിട്ടുണ്ടെങ്കിലും, ഇംഗ്ലണ്ടിനെതിരെ ഇതുവരെ കളിക്കാൻ അവസരം ലഭിച്ചിരുന്നില്ലെന്ന് മെസി പറഞ്ഞു. (Lionel Messi England First Match)
സ്വിറ്റ്സർലൻഡിനെ അധികസമയത്ത് 3-1ന് കീഴടക്കി അർജന്റീന സെമിയിലെത്തിയതിന് പിന്നാലെയാണ് മെസി തന്റെ പ്രതികരണം പങ്കുവെച്ചത്. “സത്യം പറഞ്ഞാൽ ഇത് വളരെ പ്രത്യേകമായ മത്സരമാണ്. എന്റെ കരിയറിൽ ആദ്യമായാണ് ഇംഗ്ലണ്ടിനെതിരെ കളിക്കുന്നത്. ഇംഗ്ലണ്ട് ഒരു മികച്ച ടീമാണ്, ലോക ഫുട്ബോളിലെ വലിയ ശക്തികളിലൊന്നാണ്. ഇത്തരമൊരു ടീമിനെ ലോകകപ്പ് സെമിഫൈനൽ പോലുള്ള വേദിയിൽ നേരിടുന്നത് ഏറെ ആവേശകരമാണ്,” മെസി പറഞ്ഞു.
39-കാരനായ മെസി തന്റെ കരിയറിൽ ബ്രസീൽ, ഉറുഗ്വേ, ജർമ്മനി, ഇറ്റലി, സ്പെയിൻ, ഫ്രാൻസ് തുടങ്ങിയ ലോകചാമ്പ്യൻ ടീമുകൾക്കെതിരെ കളിച്ചിട്ടുണ്ടെങ്കിലും ഇംഗ്ലണ്ടിനെതിരെ ഒരു മത്സരവും കളിച്ചിരുന്നില്ല. 2005ൽ ജനീവയിൽ നടന്ന സൗഹൃദ മത്സരത്തിൽ അർജന്റീന ഇംഗ്ലണ്ടിനെ നേരിട്ടെങ്കിലും, ഹംഗറിക്കെതിരായ അരങ്ങേറ്റ മത്സരത്തിൽ ചുവപ്പ് കാർഡ് ലഭിച്ചതിനെ തുടർന്ന് മെസിക്ക് ആ മത്സരത്തിൽ കളിക്കാൻ സാധിച്ചിരുന്നില്ല.
സ്വിറ്റ്സർലൻഡിനെതിരായ ക്വാർട്ടർ ഫൈനലിൽ കോർണറിൽ നിന്ന് അലക്സിസ് മാക് അലിസ്റ്ററിന്റെ ഗോളിന് വഴിയൊരുക്കിയത് മെസിയായിരുന്നു. തുടർന്ന് ജൂലിയൻ അൽവാരസിന്റെയും ലൗട്ടാരോ മാർട്ടിനസിന്റെയും ഗോളുകളാണ് അർജന്റീനയുടെ വിജയം ഉറപ്പിച്ചത്. ഖത്തർ ലോകകപ്പിൽ പോളണ്ടിനെതിരായ ഗ്രൂപ്പ് മത്സരത്തിന് ശേഷം ലോകകപ്പിൽ മെസി ഗോൾ നേടാതിരുന്ന ആദ്യ മത്സരവുമായിരുന്നു ഇത്.
നോക്കൗട്ട് റൗണ്ടുകളിൽ കടുത്ത വെല്ലുവിളികളാണ് അർജന്റീന മറികടന്നത്. കേപ് വെർദെയെ അധികസമയത്ത് 3-2നും, ഈജിപ്തിനെ രണ്ട് ഗോളിന് പിന്നിൽ നിന്നുയർന്ന് 3-2നും പരാജയപ്പെടുത്തിയാണ് നിലവിലെ ചാമ്പ്യൻമാർ സെമിയിലെത്തിയത്.
“ഞങ്ങൾ വലിയ സമ്മർദ്ദത്തിലൂടെയാണ് കടന്നുപോകുന്നത്. ശരീരവും അതിന്റെ ക്ഷീണം അനുഭവിക്കുന്നുണ്ട്. എന്നിരുന്നാലും, ഇതുവരെ ചെയ്തതുപോലെ മികച്ച രീതിയിൽ മത്സരിച്ച് മുന്നോട്ടുപോകാനാണ് ഞങ്ങളുടെ ലക്ഷ്യം,” മെസി പറഞ്ഞു. ഇംഗ്ലണ്ടും അർജന്റീനയും തമ്മിലുള്ള ലോകകപ്പ് ചരിത്രത്തിലെ ശ്രദ്ധേയമായ വൈരങ്ങളിൽ മറ്റൊരു അധ്യായമാകും ഇത്തവണത്തെ സെമിഫൈനൽ. 2002 ലോകകപ്പിലാണ് ഇരു ടീമുകളും അവസാനമായി ഔദ്യോഗിക മത്സരത്തിൽ ഏറ്റുമുട്ടിയത്. അന്ന് ഡേവിഡ് ബെക്കാമിന്റെ പെനാൽറ്റി ഗോളിൽ ഇംഗ്ലണ്ട് 1-0ന് വിജയിച്ചിരുന്നു.
24 വർഷത്തിന് ശേഷം ലോകകപ്പ് വേദിയിൽ വീണ്ടും ഇംഗ്ലണ്ടിനെ നേരിടുമ്പോൾ, സ്വന്തം കരിയറിലെ ആദ്യ ഇംഗ്ലണ്ട് പോരാട്ടം വിജയത്തോടെ അടയാളപ്പെടുത്തി അർജന്റീനയെ തുടർച്ചയായ രണ്ടാം ലോകകപ്പ് കിരീടത്തിലേക്ക് നയിക്കാനാണ് മെസിയുടെ ലക്ഷ്യം.
Summary: Lionel Messi has described Argentina’s FIFA World Cup 2026 semi-final against England as “special,” as it will be the first time in his international career that he faces the Three Lions. The Argentine captain is aiming to lead the defending champions into another World Cup final.
