ന്യൂഡൽഹി: തമിഴ്നാട്ടിൽ സംസ്ഥാന വ്യാപകമായി ഗോവധം നിരോധിക്കാൻ തമിഴ്നാട് സർക്കാരിനോട് നിർദ്ദേശിച്ച മദ്രാസ് ഹൈക്കോടതിയുടെ ഉത്തരവ് സുപ്രീം കോടതി സ്റ്റേ ചെയ്തു (Supreme court stay cow slaughter ban tamil nadu). സുപ്രീം കോടതിയിലെ ജസ്റ്റിസ് വിക്രാന്ത് നാഥ്, ജസ്റ്റിസ് സന്ദീപ് മെഹ്ക എന്നിവരടങ്ങുന്ന ഡിവിഷൻ ബെഞ്ചാണ് ഹൈക്കോടതി ഉത്തരവ് തടഞ്ഞുകൊണ്ട് നിർണായക ഉത്തരവ് പുറപ്പെടുവിച്ചത്.
നിയമപ്രകാരം കൃത്യമായ ലൈസൻസുള്ള കശാപ്പുശാലകളിലോ അല്ലെങ്കിൽ ബന്ധപ്പെട്ട തദ്ദേശ അധികാരികൾ പ്രത്യേകം നിശ്ചയിച്ചിട്ടുള്ള അറവുശാലകളിലോ മാത്രമേ മൃഗങ്ങളെ അറുക്കാൻ പാടുള്ളൂവെന്നായിരുന്നു മദ്രാസ് ഹൈക്കോടതിയുടെ പ്രഖ്യാപനം. കഴിഞ്ഞ മെയ് 27-ന് ബക്രീദ് ആഘോഷങ്ങളുടെ തൊട്ടുതലേ ദിവസമായിരുന്നു ഹൈക്കോടതിയിലെ ജസ്റ്റിസ് ജി.ആർ. സ്വാമിനാഥൻ ഈ കടുത്ത നിർദ്ദേശം അടങ്ങിയ ഇടക്കാല ഉത്തരവിട്ടത്. വ്യക്തിസ്വാതന്ത്ര്യത്തിനും നിലവിലുള്ള സംസ്ഥാന നിയമങ്ങൾക്കും വിരുദ്ധമാണ് ഈ ഉത്തരവെന്ന് ചൂണ്ടിക്കാട്ടിയാണ് തമിഴ്നാട് സർക്കാർ അടിയന്തരമായി സുപ്രീംകോടതിയെ സമീപിച്ചത്.
കോയമ്പത്തൂരിലെ പൊതുസ്ഥലങ്ങളിൽ ബക്രീദ് പ്രമാണിച്ച് നിയമവിരുദ്ധമായി പശുക്കളെ അറുക്കുന്നത് തടയണമെന്ന് ആവശ്യപ്പെട്ട് ‘ഹിന്ദു മക്കൾ കക്ഷി’ ജനറൽ സെക്രട്ടറി കെ. സൂര്യ പ്രശാന്ത് മദ്രാസ് ഹൈക്കോടതിയിൽ ഒരു പൊതുതാൽപ്പര്യ ഹർജി (PIL) സമർപ്പിച്ചിരുന്നു. എന്നാൽ, ഹർജിക്കാരൻ പോലും ഹർജിയിൽ ആവശ്യപ്പെടാത്ത രീതിയിൽ, ജസ്റ്റിസ് സ്വാമിനാഥൻ സ്വമേധയാ ഇടപെട്ട് സംസ്ഥാനവ്യാപകമായി ഗോ വധം പൂർണ്ണമായി നിരോധിക്കാൻ ഉത്തരവിടുകയായിരുന്നുവെന്ന് സുപ്രീം കോടതിയിൽ വ്യക്തമാക്കപ്പെട്ടു.
സുപ്രീം കോടതിയിൽ തമിഴ്നാട് സംസ്ഥാന സർക്കാരിന് വേണ്ടി മുതിർന്ന അഭിഭാഷകൻ ഡോ. അഭിഷേക് മനു സിംഗ്വി ഹാജരായി ശക്തമായ വാദമുഖങ്ങൾ നിരത്തി. 10 വയസ്സിന് മുകളിൽ പ്രായമുള്ളതും ഉൽപ്പാദനക്ഷമതയില്ലാത്തതുമായ പശുക്കളെ കൃത്യമായ മാനദണ്ഡങ്ങളോടെ അറുക്കാൻ നിയമപരമായ അനുമതി നൽകുന്ന 1958-ലെ തമിഴ്നാട് മൃഗസംരക്ഷണ നിയമത്തിന് (Tamil Nadu Animal Preservation Act, 1958) തികച്ചും വിരുദ്ധമാണ് ഹൈക്കോടതിയുടെ ഈ ഏകപക്ഷീയമായ ഉത്തരവെന്ന് സംസ്ഥാന സർക്കാർ വാദിച്ചു. സംസ്ഥാനത്ത് ഗോവധത്തിന് പൂർണ്ണമായ നിരോധനം ഏർപ്പെടുത്താൻ നിർദ്ദേശിക്കുന്നതിലൂടെ, ജനാധിപത്യപരമായി നിലവിലുള്ള നിയമങ്ങൾക്ക് പകരമായി ഹൈക്കോടതി സ്വന്തം നിലയിൽ പുതിയ നിയമനിർമ്മാണം നടത്തുകയാണ് ചെയ്തതെന്നും ഇത് കോടതിയുടെ പരിധിക്കപ്പുറമുള്ളതാണെന്നും സർക്കാർ സുപ്രീം കോടതിയെ ബോധിപ്പിച്ചു. സർക്കാരിന്റെ വാദങ്ങൾ അംഗീകരിച്ചാണ് സുപ്രീം കോടതിയുടെ സ്റ്റേ.
Story Summary: The Supreme Court bench of Justices Vikrant Nath and Sandeep Mehta stayed the Madras High Court order directing a statewide ban on cow slaughter in Tamil Nadu. The stay came after the state government, represented by Dr. A.M. Singhvi, challenged Justice G.R. Swaminathan’s Bakrid-eve order, arguing it contravened the TN Animal Preservation Act of 1958 and amounted to judicial overreach.
