മുംബൈ: സാമ്പത്തിക ബുദ്ധിമുട്ടുകൾ നിറഞ്ഞ ബാല്യകാലമാണ് തന്റെ വിജയത്തിനുള്ള പ്രചോദനമായതെന്ന് തുറന്നുപറഞ്ഞ് നടി ഭാഗ്യശ്രീ ബോഴ്സെ. താഴ്ന്ന മധ്യവർഗ കുടുംബത്തിൽ വളർന്ന താൻ മാതാപിതാക്കളുടെ കഠിനാധ്വാനവും ജീവിതപ്പോരാട്ടവുമാണ് സ്വപ്നങ്ങൾ പിന്തുടരാൻ കരുത്തായതെന്ന് ഭാഗ്യശ്രീ പറഞ്ഞു (Bhagyashri Borse Family Struggles). ഹോണസ്റ്റ് ടൗൺഹാൾ എന്ന പരിപാടിയിലായിരുന്നു നടിയുടെ തുറന്നുപറച്ചിൽ. താൻ ജനിച്ച സമയത്താണ് പിതാവിന് ജോലി നഷ്ടമായതെന്ന് ഭാഗ്യശ്രീ ഓർത്തെടുത്തു. അതിനുശേഷം കുടുംബം വർഷങ്ങളോളം സാമ്പത്തിക പ്രതിസന്ധിയിലൂടെയാണ് കടന്നുപോയത്. മക്കൾക്കായി മാതാപിതാക്കൾ ഒരിക്കലും പോരാട്ടം ഉപേക്ഷിച്ചിരുന്നില്ലെന്നും അവർ പറഞ്ഞു.
“ഞാൻ ജനിച്ച നാൾ മുതൽ ജീവിതത്തിന്റെ മറ്റൊരു മുഖമാണ് കണ്ടത്. ഞങ്ങൾ താഴ്ന്ന മധ്യവർഗ കുടുംബത്തിൽ നിന്നാണ് വന്നത്. ഇന്നത്തെ പോലെ സ്ഥിരതയുള്ള ജീവിതം ഞാൻ ഒരിക്കലും കണ്ടിട്ടില്ല. കാര്യങ്ങൾ പലപ്പോഴും തെറ്റിപ്പോകുന്നതും, അതിനിടയിലും മക്കൾക്കായി മാതാപിതാക്കൾ കഠിനമായി പരിശ്രമിക്കുന്നതുമാണ് ഞാൻ കണ്ടത്. കാരണം ഞങ്ങൾ പൂജ്യത്തിൽ നിന്നാണ് ഉയർന്നുവന്നത്,” ഭാഗ്യശ്രീ പറഞ്ഞു.
കുട്ടിക്കാലത്ത് പണത്തിന്റെ മൂല്യം മനസ്സിലായിരുന്നില്ലെങ്കിലും, വീട്ടുചെലവുകൾ മാതാപിതാക്കൾ കൃത്യമായി കണക്കുകൂട്ടി നിയന്ത്രിക്കുന്നത് കണ്ടാണ് ജീവിതപാഠങ്ങൾ പഠിച്ചതെന്നും അവർ വ്യക്തമാക്കി.
“പത്ത് രൂപയുടെ പച്ചമുളക്, പത്ത് രൂപയുടെ ചീര എന്നിങ്ങനെ ഓരോ ചെലവും കുറിച്ചുവെച്ച് അടുത്ത ആഴ്ച എങ്ങനെ മുന്നോട്ട് പോകുമെന്നായിരുന്നു അവരുടെ കണക്ക്. മാതാപിതാക്കളുടെ ആ പോരാട്ടം നേരിൽ കണ്ടാണ് ഞാൻ വളർന്നത്,” നടി പറഞ്ഞു. ജീവിതത്തിൽ ഒരിക്കലും മറക്കാനാകാത്ത അനുഭവത്തെക്കുറിച്ചും ഭാഗ്യശ്രീ സംസാരിച്ചു. ജോലി ലഭിക്കാനായി “എനിക്ക് രണ്ട് പെൺമക്കളുണ്ട്, ദയവായി ഒരു ജോലി തരൂ” എന്ന് മറ്റൊരാളോട് അപേക്ഷിക്കുന്ന പിതാവിനെ കണ്ട നിമിഷം തന്റെ മനസ്സിൽ വലിയ മുറിവ് സൃഷ്ടിച്ചുവെന്ന് അവർ പറഞ്ഞു. “അച്ഛൻ ഇങ്ങനെ അപേക്ഷിക്കുന്നത് ഒരു കുട്ടിയായ എനിക്ക് സഹിക്കാനായില്ല. ഇനി ഒരിക്കലും എന്റെ അച്ഛന് ഇങ്ങനെ ആരോടും ജോലി ചോദിക്കേണ്ടി വരരുതെന്ന് അന്നുതന്നെ ഞാൻ തീരുമാനിച്ചു. അദ്ദേഹത്തിന്റെ തല എന്നും ഉയർന്നുനിൽക്കാൻ ഞാൻ വളർന്ന് വിജയിക്കണമെന്നാണ് എന്റെ ജീവിതലക്ഷ്യമായി മാറിയത്,” ഭാഗ്യശ്രീ വികാരാധീനയായി പറഞ്ഞു.
മഹാരാഷ്ട്രയിലെ ഔറംഗാബാദിൽ ജനിച്ച ഭാഗ്യശ്രീ ബോഴ്സെ, പഠനത്തിന്റെ ഒരു ഭാഗം നൈജീരിയയിലെ ലാഗോസിലായിരുന്നു പൂർത്തിയാക്കിയത്. തുടർന്ന് മുംബൈയിലെത്തി മോഡലിങ്ങിനൊപ്പം മാനേജ്മെന്റ് സ്റ്റഡീസിൽ ബിരുദവും നേടി. യാരിയാൻ 2, ചന്ദു ചാമ്പ്യൻ എന്നീ ചിത്രങ്ങളിലൂടെ അഭിനയരംഗത്തെത്തിയ ഭാഗ്യശ്രീ, രവി തേജയ്ക്കൊപ്പമുള്ള മിസ്റ്റർ ബച്ചൻ എന്ന ചിത്രത്തിലൂടെയാണ് നായികയായി അരങ്ങേറ്റം കുറിച്ചത്.
ജൂലൈ 10-ന് പുറത്തിറങ്ങിയ ലെനിൻ എന്ന ചിത്രത്തിൽ അഖിൽ അക്കിനേനിക്കൊപ്പമാണ് ഭാഗ്യശ്രീ ഏറ്റവും ഒടുവിൽ അഭിനയിച്ചത്. തമിഴ് താരം ശിവകാർത്തികേയനൊപ്പം എത്തുന്ന സീയോൻ ആണ് നടിയുടെ പുതിയ ചിത്രം.
Summary: Actress Bhagyashri Borse has shared the emotional story of growing up in a financially struggling lower middle-class family, revealing how her father’s job loss shaped her childhood. She said her parents’ sacrifices became the driving force behind her ambition to succeed.
