ലണ്ടൻ: ഇന്ത്യൻ സിനിമയുടെ ചരിത്രത്തിലെ ക്ലാസിക് ചിത്രങ്ങളിലൊന്നായ ‘ലഗാൻ’ റിലീസ് ചെയ്ത് 25 വർഷം പൂർത്തിയായതിന്റെ ആഘോഷത്തിൽ ലണ്ടനിൽ വീണ്ടും ഒന്നിച്ച് ആമിർ ഖാനും ബ്രിട്ടീഷ് നടി റേച്ചൽ ഷെല്ലിയും. ഇന്ത്യൻ ഫിലിം ഫെസ്റ്റിവൽ ലണ്ടന്റെ ഭാഗമായി സംഘടിപ്പിച്ച സിൽവർ ജൂബിലി ചടങ്ങിലാണ് ഇരുവരും വീണ്ടും കണ്ടുമുട്ടിയത് (Aamir Khan Rachel Shelley Reunion). ചടങ്ങിലെ ചിത്രങ്ങൾ റേച്ചൽ ഷെല്ലി സമൂഹമാധ്യമങ്ങളിൽ പങ്കുവെച്ചതോടെ ആരാധകരുടെ ശ്രദ്ധ പിടിച്ചുപറ്റി.
ബിഎഫ്ഐ ഫിലിം അക്കാദമിയിലും ഐമാക്സ് യുകെയിലുമായി നടന്ന പ്രത്യേക പരിപാടിയിൽ ആമിർ ഖാൻ ചിത്രത്തെക്കുറിച്ച് സംസാരിക്കുന്ന ചിത്രങ്ങളും ഇരുവരും ഒരുമിച്ചുള്ള ഫോട്ടോകളും റേച്ചൽ ഇൻസ്റ്റാഗ്രാമിൽ പങ്കുവെച്ചു. “ലഗാൻ 25 വർഷം. മനോഹരമായ ഈ ആഘോഷത്തിനായി ആമിർ ഖാൻ പ്രൊഡക്ഷൻസിന് നന്ദി,” എന്നാണ് ചിത്രങ്ങൾക്കൊപ്പം റേച്ചൽ കുറിച്ചത്.
ലഗാന്റെ 25-ാം വാർഷികത്തോടനുബന്ധിച്ച് റേച്ചൽ ഷെല്ലി നേരത്തെയും വികാരനിർഭരമായ വീഡിയോ സന്ദേശം പങ്കുവെച്ചിരുന്നു. ചിത്രത്തിന്റെ ഓർമ്മകൾ ഇന്നും തന്റെ ജീവിതത്തിന്റെ ഭാഗമാണെന്ന് പറഞ്ഞ റേച്ചൽ, ചിലപ്പോൾ ഇന്നലെയാണോ ആ സിനിമ ചെയ്തതെന്ന് തോന്നാറുണ്ടെന്നും, ചിലപ്പോൾ അത് മറ്റൊരു ജന്മത്തിലെ അനുഭവം പോലെയാണെന്നും പറഞ്ഞു.
ചിത്രത്തിന്റെ വിജയം അണിയറപ്രവർത്തകരുടേത് മാത്രമല്ലെന്നും പ്രേക്ഷകരാണ് ആ സിനിമയെ പൂർണമാക്കിയതെന്നും അവർ അഭിപ്രായപ്പെട്ടു. വർഷങ്ങളായി വിവിധ രാജ്യങ്ങളിലെയും തലമുറകളിലെയും പ്രേക്ഷകർ നൽകിയ സ്നേഹമാണ് ‘ലഗാൻ’ ഇന്നും ജീവിച്ചിരിക്കുന്നതിന്റെ പ്രധാന കാരണമെന്നും റേച്ചൽ കൂട്ടിച്ചേർത്തു. 2001-ൽ പുറത്തിറങ്ങിയ ‘ലഗാൻ’ സംവിധാനം ചെയ്തത് അശുതോഷ് ഗൊവാരിക്കറാണ്. ആമിർ ഖാൻ നിർമ്മിച്ച ചിത്രത്തിൽ അദ്ദേഹം തന്നെ ഭൂവൻ എന്ന നായക കഥാപാത്രത്തെ അവതരിപ്പിച്ചു. ബ്രിട്ടീഷ് ഭരണകാലത്തെ പശ്ചാത്തലമാക്കി ഒരുക്കിയ ചിത്രത്തിൽ നികുതി ഒഴിവാക്കാനായി ഇംഗ്ലീഷ് ഉദ്യോഗസ്ഥരെ ക്രിക്കറ്റ് മത്സരത്തിന് വെല്ലുവിളിക്കുന്ന ഒരു ഗ്രാമത്തിന്റെ കഥയാണ് പറയുന്നത്.
ചിത്രത്തിൽ ബ്രിട്ടീഷ് ഓഫീസർ ക്യാപ്റ്റൻ ആൻഡ്രൂ റസലിന്റെ സഹോദരിയായ എലിസബത്ത് റസൽ എന്ന കഥാപാത്രമായാണ് റേച്ചൽ ഷെല്ലി അഭിനയിച്ചത്. ഗ്രാമവാസികൾക്ക് രഹസ്യമായി ക്രിക്കറ്റ് പഠിപ്പിക്കുന്ന എലിസബത്തിന്റെ കഥാപാത്രം ചിത്രത്തിലെ ഏറ്റവും ശ്രദ്ധേയമായ കഥാപാത്രങ്ങളിലൊന്നായിരുന്നു.
ഓസ്കർ നാമനിർദേശം ഉൾപ്പെടെ നിരവധി അന്താരാഷ്ട്ര അംഗീകാരങ്ങൾ നേടിയ ‘ലഗാൻ’, ഇന്ത്യൻ സിനിമയുടെ എക്കാലത്തെയും മികച്ച ചിത്രങ്ങളിലൊന്നായി ഇന്നും വിലയിരുത്തപ്പെടുന്നു.
Summary: Aamir Khan and British actress Rachel Shelley reunited in London during the silver jubilee celebration of Lagaan at the Indian Film Festival London. Sharing photos from the event, Rachel thanked Aamir Khan Productions and reflected on the film’s enduring legacy and the love it continues to receive from audiences worldwide.
