മർദനമേറ്റു ചികിത്സയിൽ കഴിഞ്ഞവരെ ആശുപത്രിയിൽ കയറി ആക്രമിച്ചു
നെടുമങ്ങാട്: തിരുവനന്തപുരം നെടുമങ്ങാട് ജില്ലാ ആശുപത്രിയിൽ ചികിത്സയിൽ കഴിഞ്ഞവർക്കു നേരെ ആക്രമണം. യുവമോർച്ച പ്രവർത്തകരായ ആരോമൽ, അഭിജിത്ത് എന്നിവർക്കു നേർക്കാണ് ആക്രമണമുണ്ടായത്.
ഓണനാളിൽ ആരോമലിനു നേരെ ആക്രമണമുണ്ടായിരുന്നു. ഇതേതുടർന്ന് ഇയാളെ നെടുമങ്ങാട് ജില്ലാ ആശുപത്രിയിൽ പ്രവേശിപ്പിച്ചിരിക്കുകയായിരുന്നു.
വെള്ളിയാഴ്ച പോലീസിൽ നൽകിയ പരാതി പിൻവലിക്കണമെന്നാവശ്യപ്പെട്ട് എത്തിയ അക്രമി സംഘം, കേസ് പിൻവലിക്കില്ലെന്നു തീർത്തു പറഞ്ഞ ആരോമലിനെ അക്രമിക്കുകയായിരുന്നെന്ന് പോലീസിൽ നൽകിയ പരാതിയിൽ യുവമോർച്ച പ്രവർത്തകർ ആരോപിക്കുന്നു. ആരോമലിനു കൂട്ടിരുന്ന അഭിജിത്തിനും മർദനമേറ്റു.
സംഭവവുമായി ബന്ധപ്പെട്ട് പോലീസ് രണ്ടുപേരെ അറസ്റ്റ് ചെയ്തു.