അമ്മയുടെ മൃതദേഹത്തിനൊപ്പം മകളും കൊച്ചുമകളും കഴിഞ്ഞത് മൂന്നു വര്‍ഷം
ടെക്സസ്: അമ്മയുടെ മൃതദേഹത്തിനൊപ്പം മകളും കൊച്ചുമകളും കഴിഞ്ഞത് മൂന്നു വര്‍ഷം. യുഎസിലെ ടെക്സസിലാണു സംഭവം നടന്നത്. രണ്ടുമുറി വീട്ടില്‍ മൃതദേഹത്തിന്‍റെ അവശിഷ്ടങ്ങള്‍ കണ്ടെത്തിയതിനെ തുടര്‍ന്ന് നടത്തിയ അന്വേഷണത്തിലാണ് സംഭവം പുറത്ത് അറിയുന്നത്.
2016-ല്‍ എഴുപത്തൊന്നുകാരിയായ വയോധിക വീണതിനെ തുടര്‍ന്ന് പരിക്കേറ്റിരുന്നു. എന്നാല്‍, മകള്‍ അമ്മയ്ക്ക് ആവശ്യമായ ചികിത്സ നല്‍കിയില്ല. കുറച്ചു ദിവസങ്ങള്‍ക്ക് ശേഷം വൃദ്ധ മരിച്ചു. എന്നാല്‍, മൃതദേഹം നീക്കാന്‍ മകള്‍ തയാറായില്ലെന്ന് പോലീസ് പറയുന്നു.
ഒരു മുറിയില്‍ മൃതദേഹം കിടക്കുന്പോള്‍ തൊട്ടടുത്ത മുറിയിലാണ് മകളും കുട്ടിയും ഉറങ്ങിയിരുന്നത്. വൃദ്ധ മരിക്കുമ്പോൾ കൊച്ചു മകള്‍ക്ക് 15 വയസായിരുന്നു പ്രായം. ഇതിന്‍റെ അടിസ്ഥാനത്തില്‍ കുട്ടിയുടെ അമ്മയെ പോലീസ് അറസ്റ്റ് ചെയ്തു. കുട്ടിയെ പിന്നീട് ബന്ധുക്കളുടെ സംരക്ഷണയിലേക്കു മാറ്റി. കുട്ടിക്ക് അപകടം വരുത്തിയ കുറ്റമാണ് അമ്മയ്ക്കെതിരെ ചുമത്തിയിരിക്കുന്നത്. കുറ്റം തെളിഞ്ഞാല്‍ 20 വര്‍ഷം തടവോ 10,000 ഡോളര്‍ പിഴയോ ലഭിച്ചേക്കാം.
