യൂറോ കപ്പ് ഫുട്ബോളിന് ഇന്ന് കിക്കോഫ്; ഇറ്റലി- തുർക്കി ഉദ്‌ഘാടന മത്സരം

By Neena Alex Jun 11, 2021, 10:33 IST

ഫുട്ബോൾ പ്രേമികൾക്ക് ആവേശമുണർത്തി യൂറോ കപ്പ് ഫുട്ബോളിന് ഇന്ന് തുടക്കമാകും. റോമിലെ ഒളിമ്പിക് സ്റ്റേഡിയത്തിൽ വെച്ച് നടക്കുന്ന ഉദ്‌ഘാടന മത്സരത്തിൽ ഇറ്റലി തുർക്കിയെ നേരിടും. ഇന്ത്യൻ സമയം രാത്രി 12.30 നാണ് മത്സരം. 2020 ൽ നടക്കേണ്ടിയിരുന്ന മത്സരം കോവിഡ് പ്രതിസന്ധിയെ തുടർന്ന് ഈ വർഷത്തേക്ക് മാറ്റിവെയ്ക്കുകയായിരുന്നു. ഇന്ന് നടക്കുന്ന മത്സരത്തിൽ അവസാന ഇരുപത്തിയേഴ് മത്സരങ്ങളിൽ തോൽവി വഴങ്ങാതെ എത്തുന്ന ഇറ്റലിയെ നേരിടാൻ തുർക്കി നന്നായി പരിശ്രമിക്കേണ്ടിവരും. തുർക്കിയെയും വിലകുറച്ച് കാണാനാവില്ല. കഴിഞ്ഞ അവസാന 26 മത്സരങ്ങളിൽ മൂന്ന് എണ്ണത്തിൽ മാത്രമേ തുർക്കി പരാജയപ്പെട്ടുള്ളൂ. കൂടാതെ യൂറോ കപ്പിൽ പങ്കെടുക്കുന്ന 24 ടീമുകളിൽ ഏറ്റവും പ്രായം കുറഞ്ഞ ടീമാണ് തുർക്കിയുടേത്. 25 വയസാണ് ശരാശരി പ്രായം. 11 തവണ ഇറ്റലിയും തുർക്കിയും ഏറ്റുമുട്ടിയപ്പോൾ ഒരിക്കൽ പോലും തുർക്കിയ്ക്ക് ഇറ്റലിയെ പരാജയപ്പെടുത്താൻ സാധിച്ചിട്ടില്ല. 8 കളികളിൽ ഇറ്റലി ജയിച്ചപ്പോൾ മൂന്ന് മത്സരം സമനിലയിലായി. 11 വേദികളിലായാണ് യൂറോ കപ്പ് മത്സരങ്ങൾ നടക്കുക. ക്രിസ്റ്റിയാനോ റൊണാൾഡോയുടെ പോർച്ചുഗലാണ് നിലവിലെ യൂറോ ചാമ്പ്യന്മാർ.