മുട്ടവിൽപ്പനക്കാരന്റെ വണ്ടിയിൽ നിന്നും മുട്ട മോഷണം; പൊലീസ് ഹെഡ്കോൺസ്റ്റബിളിന് സസ്പെൻഷൻ
May 15, 2021, 22:00 IST
ചണ്ഡീഗഡ്: മുട്ടവിൽപ്പനക്കാരന്റെ വണ്ടിയിൽ നിന്നും മുട്ട മോഷ്ടിച്ച് പാൻറ്സിന്റെ പോക്കറ്റിൽ വെച്ച പൊലീസിന് സസ്പെൻഷൻ. ഹെഡ്കോൺസ്റ്റബിൾ പ്രിത്പാൽ സിംഗിനെയാണ് ഡിപ്പാർട്ട്മെൻറ് സസ്പെൻഡ് ചെയ്തത്. സ്കൂട്ടറിലെത്തിയ മുട്ട വിൽപനക്കാരൻ വാഹനം റോഡരികിൽ പാർക്ക് ചെയ്ത ശേഷം കടകളിലേക്ക് മുട്ട വിതരണം നടത്തുന്നതിനിടയിലാണ് പ്രിത്പാൽ മോഷണം നടത്തിയത്. മോഷണം നടത്തുന്ന വിഡിയോ ആരോ മൊബൈലിൽ പകർത്തി സമൂഹമാധ്യമത്തിൽ പോസ്റ്റ് ചെയ്തു. ഇതോടെ മോഷണം വാർത്തയാവുകയും പഞ്ചാബ് പൊലീസ് ഡിപ്പാർട്ട്മെൻറ് പ്രിത്പാലിനെ സസ്പെൻറ് ചെയ്യുകയുമായിരുന്നു.