ടൗട്ടെ ചുഴലിക്കാറ്റ്; അടിയന്തര സാഹചര്യം നേരിടാന് സംസ്ഥാനം തയ്യാറെന്ന് മുഖ്യമന്ത്രി
തിരുവനന്തപുരം: ടൗട്ടെ ചുഴലിക്കാറ്റ് ശക്തി പ്രാപിക്കുമെന്ന മുന്നറിയിപ്പിനെ തുടര്ന്ന് അടിയന്തര സാഹചര്യം നേരിടാന് സംസ്ഥാനം തയ്യാറെന്ന് മുഖ്യമന്ത്രി പിണറായി വിജയന് വാര്ത്താസമ്മേളനത്തില് അറിയിച്ചു. ഇന്ന് രാത്രി വളരെ നിര്ണായകമാണ്. റെഡ് അലര്ട്ട് ജില്ലകളില് അതിതീവ്ര മഴക്കും കാറ്റിനും സാദ്ധ്യതയുണ്ടെന്നും അദ്ദേഹം മുന്നറിയിപ്പ് നൽകി. അടുത്ത 24 മണിക്കൂറില് ന്യൂനമർദ്ദം ശക്തി വര്ധിച്ച് ചുഴലിക്കാറ്റായി മാറുമെന്നാണ് പ്രവചനം. ചുഴലിക്കാറ്റിന്റെ പ്രവചിക്കപ്പെട്ടിരിക്കുന്ന സഞ്ചാര പഥത്തില് കേരളമില്ല. ന്യൂനമര്ദ കേന്ദ്രത്തിന്റെ നിലവിലെ സ്ഥാനം കേരള തീരത്തുനിന്ന് അധികം അകലെയല്ല. അതുകൊണ്ടുതന്നെ കേരളത്തില് മേയ് 16വരെ അതിതീവ്ര മഴയും ശക്തമായ കാറ്റും രൂക്ഷമായ കടല്ക്ഷോഭവും തുടരുമെന്നാണ് മുന്നറിയിപ്പ്. സര്ക്കാര് സംവിധാനങ്ങളും പൊതുജനങ്ങളും അതീവ ജാഗ്രത തുടരണം.