ഡോളർ കടത്ത്: ചോദ്യം ചെയ്യലിന് പിന്നാലെ സ്പീക്കറുടെ ഫ്ളാറ്റിൽ കസ്റ്റംസ് പരിശോധന
തിരുവനന്തപുരം: ഡോളർ കടത്തുമായി ബന്ധപ്പെട്ട് സ്പീക്കർ പി. ശ്രീരാമകൃഷ്ണന്റെ തിരുവനന്തപുരം ചാക്കയിലെ ഫ്ളാറ്റിൽ കസ്റ്റംസ് പരിശോധന നടത്തി. സ്പീക്കറെ ചോദ്യം ചെയ്തതിന് പിന്നാലെയാണ് ഫ്ളാറ്റിൽ കസ്റ്റംസ് പരിശോധന നടത്തിയത്.സ്വർണക്കടത്ത് കേസ് പ്രതി സ്വപ്ന സുരേഷ് കസ്റ്റംസിന് നൽകിയ മൊഴിയിൽ സ്പീക്കറുടെ ഫ്ളാറ്റിനെ കുറിച്ച് പരാമർശിച്ചിരുന്നു. ഇതിന്റെ അടിസ്ഥാനത്തിലാണ് സ്പീക്കറുടെ ഫ്ളാറ്റിൽ കസ്റ്റംസ് പരിശോധന നടത്തുന്നത്. ഇന്നലെയും ഇന്നുമായാണ് പരിശോധന നടക്കുന്നത്. ഫ്ളാറ്റിൽ സന്ദർശനത്തിനെത്തിയവരുടെ അടക്കം വിവരങ്ങൾ കസ്റ്റംസ് ശേഖരിക്കുന്നുണ്ട്.സ്വർണക്കടത്ത് കേസിൽ ഉൾപ്പെടെ പ്രതിയായ സന്ദീപ് നായർ അടക്കമുള്ളവർ ഇവിടെ സന്ദർശനത്തിനെത്തിയതായാണ് സ്വപ്നയുടെ മൊഴിയിലുള്ളത്. ഈ മൊഴി അടിസ്ഥാനമാക്കിയാണ് പരിശോധന.