കിണറ്റില് വീണ ആടിനെയും, രക്ഷിക്കാനിറങ്ങിയ ആളിനെയും ഒടുവിൽ കരക്ക് കയറ്റിയത് ഫയർഫോഴ്സ്
കോഴിക്കോട്: നാദാപുത്ത് കിണറ്റില് വീണ ആടിനെ രക്ഷിക്കാൻ ഇറങ്ങിയ ആളും കിണറ്റിൽ കുടുങ്ങി. ചൊവ്വാഴ്ച രാവിലെ പത്തരയോടെ ആണ് സംഭവം. അരൂരിലെ പടിഞ്ഞാറക്കണ്ടി ജ്യോതികുമാറിന്റെ കിണറ്റിൽ അയല്വാസിയുടെ ആട് വീഴുകയായിരുന്നു.തുടർന്ന് ആടിനെ രക്ഷിക്കാൻ ഉടമയായ 61 കാരൻ കിണറ്റിൽ ഇറങ്ങി. വെള്ളത്തിൽ മുങ്ങിത്താണ ആടിനെ സാഹസികമായി കൈകളിൽ ഉയർത്തിപ്പിടിക്കുകയായിരുന്നു. എന്നാൽ ആടിനെയും ഉടമയെയും കരക്ക് കയറ്റാനുള്ള നാട്ടുകാരുടെ ശ്രമം വിജയിച്ചില്ല. ഇതോടെ ഫയർഫോഴ്സിൽ വിവരം അറിയിക്കുകയായിരുന്നു.ചേലക്കാട് നിന്നുമെത്തിയ ഫയർഫോഴ്സ് സംഘം രക്ഷപ്പെടുത്തുകയായിരുന്നു. സീനിയര് ഫയര്മാന് ആർ. രാമദാസ്, ദീപക്, ആര്.എന്. രനീഷ്, പി.എം. വിജേഷ്, കെ.പി. ശ്രീജിത് രക്ഷാപ്രവര്ത്തനത്തിന് നേതൃത്വം നൽകി.