ആ തന്ത്രവും പൊളിച്ചടുക്കി കസ്റ്റംസ്.! കാഡ്ബറീസ് ചോക്ലേറ്റിന്റെ കവറിനുള്ളിലാക്കി അടിവസ്ത്രത്തിനുള്ളില്‍ വച്ച് സ്വര്‍ണം കടത്താൻ ശ്രമം; അറസ്റ്റ്
ചെന്നൈ: സ്വർണം കടത്താൻ മാഫിയകൾ ദിവസവും പുതിയ തന്ത്രങ്ങളുമായാണ് എത്തുന്നത്. ഇപ്പോളിതാ കാഡ്ബറി ഡയറി മില്‍ക്ക് ചോക്ലേറ്റിന്റെ രൂപത്തില്‍ സ്വർണം കടത്താനുള്ള ശ്രമവും കസ്റ്റംസ് പൊളിച്ചടുക്കി . ദുബായില്‍ നിന്ന് ചെന്നൈ വിമാനത്താവളത്തില്‍ വന്നിറങ്ങിയ യാത്രക്കാരനില്‍ നിന്നാണു ചോക്ലേറ്റ് കൈവരിലൊളിപ്പിച്ച സ്വര്‍ണം പിടിച്ചത്. വലിയ കാഡ്ബറീസ് ചോക്ലേറ്റിന്റെ കവറിനുള്ളിലാക്കി അടിവസ്ത്രത്തിനുള്ളില്‍ ഒളിപ്പിച്ചായിരുന്നു സ്വർണം കടത്താൻ ശ്രമിച്ചത്. രഹസ്യ വിവരത്തിന്റെ അടിസ്ഥാനത്തിലാണ് എമിറേറ്റ്സ് വിമാനത്തില്‍ വന്നിറങ്ങിയ ചെന്നൈ സ്വദേശി പത്മബാലാജിയെ കസ്റ്റംസ് കസ്റ്റഡിയിലെടുത്തത്. പതിവു പരിശോധനകളില്‍ ഒന്നും കണ്ടെത്താനായില്ല. തുടര്‍ന്നു ശരീര പരിശോധനയിലാണ് അടിവസ്ത്രത്തിനുള്ളില്‍ ചോക്ലേറ്റുകള്‍ കണ്ടത്. പിടിച്ചെടുത്തു തുറന്നപ്പോള്‍ 660 ഗ്രാം തൂക്കമുള്ള കുഴമ്പു രൂപത്തിലുള്ള സ്വര്‍ണം കൊണ്ടുണ്ടാക്കിയ ചോക്ലേറ്റാണെന്നു കണ്ടെത്തുകയായിരുന്നു. ഉരുക്കിയപ്പോള് 28.7 ലക്ഷം രൂപ വിലവരുന്ന 546 ഗ്രാം സ്വര്‍ണം കണ്ടെടുത്തു. അതേസമയം, ബുധനാഴ്ച വൈകീട്ട് എയര്‍ ഇന്ത്യയുടെ ദുബായ് വിമാനത്തില്‍ എത്തിയ പതിനൊന്നു പേരില്‍ നിന്നായി 2.15 കിലോ സ്വര്‍ണം കസ്റ്റംസ് പിടികൂടിയിരുന്നു. കുഴമ്പു രൂപത്തിലാക്കി മലദ്വാരത്തിനുള്ളില്‍ ഒളിപ്പിച്ച നിലയിലായിരുന്നു സ്വര്‍ണം. മറ്റു രണ്ടു വിമാനങ്ങളിലായി ഷാര്‍ജയില്‍ നിന്നും ദുബായില്‍ നിന്നും എത്തിയ യാത്രക്കാരില്‍ നിന്നും സ്വര്‍ണം കണ്ടെടുത്തു. 24 മണിക്കൂറിനിടെ 3.72 കിലോ സ്വര്‍ണമാണ് വിമാനത്താവളത്തില്‍ പിടിച്ചത്.
